ജാനകിയുടെ സ്വന്തം ജാനു

 സമരങ്ങൾക്ക് നടുവിലായിരുന്നു എന്നും സി.കെ. ജാനു  നീണ്ട ആ സമരകാലത്തിന് ചെറിയ ഇടവേള നൽകി മകൾ ജാനകിക്കൊപ്പമുള്ള ജീവിതം ആസ്വദിക്കുകയാണ് അവർ

- വിഷ്ണു രാമകൃഷ്ണന്‍

കാട്ടിക്കുളത്തു നിന്ന്‌ പനവല്ലിയിലേക്കുള്ള യാത്രയ്ക്കിടയില്‍ ഓട്ടോക്കാരന്‍ ചിരിച്ചുകൊണ്ട്‌ പറഞ്ഞു; ഞങ്ങളൊക്കെ ആ സ്ഥലത്തെ ജാനുക്കവലയെന്നാ വിളിക്കുന്നത്‌. പൊയ്ക്കൊണ്ടിരിക്കുന്നതിനിടയില്‍ അയാള്‍ ഇത്രയും കൂടി പറഞ്ഞു; അവര്‍ക്ക്‌ ഇപ്പൊ വലിയ കാറൊക്കെ ഉണ്ടല്ലോ! പിന്നെ നല്ലൊരു വീടും..." ആട്ടിന്‍പറ്റങ്ങളെയും പുല്ല്‌ ചെത്തുന്ന പെണ്ണുങ്ങളെയും കടന്ന്‌ മൂന്ന്‌ ദിശകളിലേക്ക്‌ നീണ്ടുപോകുന്ന വഴിയില്‍ വണ്ടി നിന്നു. ഇതിലേ പോയാ നേരെചെന്ന്‌ മുട്ടുന്നത്‌ അവരുടെ വീട്ടിലാ.” ഓട്ടോക്കാരന്‍ കാണിച്ചുതന്ന വഴിയിലൂടെ നടന്ന്‌ രണ്ട്‌ കയറ്റങ്ങളും കുത്തനെയുള്ള ഒരിറക്കവും പിന്നിട്ടപ്പോള്‍ ചെറിയൊരു വീടും പ്രതീക്ഷിച്ച ആളും അതാ മുന്നില്‍. തലയില്‍ മുഷിഞ്ഞ ഒരു തോര്‍ത്തുമുണ്ടും മണ്ണ്‌ പറ്റിയ ഷര്‍ട്ടും ധരിച്ച്‌ മൊബൈലിലെ ഏതോ വാര്‍ത്താശകലത്തില്‍ മുഴുകിയിരിക്കുകയായിരുന്നു സി.കെ. ജാനു. ഇറയത്ത്‌ ഒരു അരിവാള്‍ കിടപ്പുണ്ട്‌. പോയ സമരകാലത്തെ ഓര്‍മിക്കുംപോലെ അരിവാളിലേക്ക്‌ നോക്കി ഉശിരും വാശിയും നിറഞ്ഞ ഒരു ചിരി. ഭൂമിക്കു വേണ്ടിയുള്ള ആദിവാസിസമൂഹത്തിറെ പോരാട്ടങ്ങളില്‍ മുന്‍പന്തിയില്‍ നില്‍ക്കുകയും ആ ജനതയുടെ നിലയ്ക്കാത്ത ശബ്ദമായി കേരളമാകെ പടരുകയും ചെയ്ത സ്ത്രീ. മുത്തങ്ങ മരവും ആറളം സമരവുമൊക്കെ ആ പോരാട്ടത്തിന്റെ വീര്യം കൂട്ടുന്നു.  വളര്‍ത്തുമകള്‍ ജാനകിക്കൊപ്പം പുതിയ ജീവിതം ആസ്വദിക്കുകയാണ്‌ അവര്‍. രാവിലെ ആരംഭിച്ച കൃഷിപ്പണികളില്‍നിന്ന്‌ ചെറിയ വിശ്രമമെടുത്ത്‌ സി.കെ.ജാനു വീടിനകത്തേക്ക്‌ കയറി.

ഇന്നത്തെ ജോലിയൊക്കെ കഴിഞ്ഞോ?