ഒരിടത്തൊരിടത്ത് ഒരമ്മയും മകനും

പരസ്പരം കാണാൻ അമ്മയുടെയും മകന്റെയും കാത്തിരിപ്പ്. ക്ലൈമാക്സിൽ ട്വിസ്റ്റ്. ഗീതമ്മയുടെയും ഗോവിന്ദിന്റെയും ജീവിതം

- രശ്മി രഘുനാഥ്

ഓഗസ്റ്റ് 28 ന് കോട്ടയം കറുകച്ചാൽ പോലീസ് സ്റ്റേഷനിൽ സസ്പെൻസ് നിറഞ്ഞ സിനിമയുടെ ക്ലൈമാക്സിനെ വെല്ലുന്ന രംഗം അരങ്ങേറി. കറുകച്ചാൽ കറ്റുവെട്ടി ചെറു പുതുപ്പള്ളിയിൽ ഗീതമ്മയെ തേടി 27കാരനായ മകൻ ഗോവിന്ദ് എത്തുന്നു. രണ്ടര വയസ്സിൽ നഷ്ടമായ മകനെ കിട്ടിയ സന്തോഷത്താൽ അമ്മ പൊട്ടിക്കരയുന്നു. അമ്മയെ നെഞ്ചോട് ചേർത്ത് മകൻ. കണ്ടുനിന്നവരെ കരയിച്ച അപൂർവ സമാഗമം.

ഫ്ളാഷ്ബാക്ക്

ഓർമയായ കാലം മുതൽ രാജ്കോട്ടിലെ തെരുവുകളിലൂടെ പോകുമ്പോഴൊക്കെ കുഞ്ഞുഗോവിന്ദ് തേടിയത് അമ്മയെയാണ്. ആ മുഖമോ സ്നേഹമോ ഒരു തരിമ്പുപോലും ഓർമയിലില്ല. പക്ഷേ, കൂട്ടുകാരുടെ അമ്മമാർ മക്കളോട് കാണിക്കുന്ന സ്നേഹം കാണുമ്പോൾ ഗോവിന്ദ് തിരിച്ചറിഞ്ഞിട്ടുണ്ട് അമ്മയുടെ സ്നേഹം.

തന്നെ വളർത്തുന്ന, പൂയി' എന്ന് താൻ വിളിക്കുന്ന അച്ഛന്റെ സഹോദരി അവന് ഒരു കഥ പറഞ്ഞു കൊടുക്കുമായിരുന്നു. അവന്റെ അമ്മയുടെ കഥ. അവന്റെ കഥ. മുപ്പതുവർഷം മുമ്പ് ഗുജറാത്തിലെ വരാവേലിലെ ഒരു ചെമ്മീൻ കമ്പനിയിൽ ജോലി ചെയ്തപ്പോൾ പ്രണയത്തിലായ ഗുജറാത്തുകാരൻ രമേഷിന്റേയും കോട്ടയംകാരി ഗീതമ്മയുടേയും പ്രണയകഥ. അവർ പിന്നീട് വിവാഹിതരായി. ഗുജറാത്തിൽ വെച്ച് ഗോവിന്ദ് ജനിച്ചു.

രമേഷിന്റെ കുടുംബാംഗങ്ങളോടൊപ്പം രാജ്കോട്ടിലെ വീട്ടിൽ കഴിയവേ ഗീതമ്മ രണ്ടാമതും ഗർഭം ധരിച്ചു. പ്രസവത്തിനായി അവർ നാട്ടിലേക്ക് മടങ്ങി. പ്രസവിച്ചു. കുഞ്ഞിനെ കാണാൻ രമേഷ് കറുകച്ചാലിലെത്തുമ്പോൾ ഗോവിന്ദിന് ഒന്നര വയസ്സ്. രണ്ടാമത്തെ കുഞ്ഞിനെ കണ്ടപ്പോൾ ആകെ ദേഷ്യമായി രമേഷിന് പെൺകുഞ്ഞിനെ വേണ്ടെന്നായി. ഗോവിന്ദിനെയും എടുത്ത് അയാൾ അവിടെ നിന്നും പോയി. ഗീതമ്മയ്ക്കോ കുടുംബാംഗങ്ങൾക്കോ അയാളെ എതിർക്കാനാകുമായിരുന്നില്ല. കരഞ്ഞുതളർന്ന് ഗീതമ്മ പലവട്ടം കത്തയച്ചു. അതിന് കിട്ടിയ മറുപടി ഭീഷണിയായിരുന്നു. “ഇനി മേലാൽ കത്ത് അയയ്ക്കരുത്. ബന്ധപ്പെടാൻ ശ്രമിച്ചാൽ ഗോവിന്ദ് ജീവനോടെ കാണില്ല. ഞാൻ മറ്റൊരു വിവാഹം കഴിച്ച് ജീവിക്കുന്നു. 

അതോടെ ഗീതമ്മയിലെ അമ്മ അടങ്ങി. എവിടെയാണെങ്കിലും തന്റെ കുഞ്ഞ് സുഖമായിട്ടിരുന്നാൽ മതി. തന്റെ ഓരോ ശ്വാസത്തിലും ഗോവിന്ദുണ്ടെന്ന വിശ്വാസത്തിലാണ് ഗീതമ്മ പിന്നെ ജീവിച്ചത്.