പുലി...പുലി പുലിയോ...പുലി

കാഴ്ചകളുടെ നാടാണ് തൃശ്ശൂർ... ഓണം, പൂരം, പെരുന്നാൾ... ഏതാഘോഷവും കെങ്കേമമാക്കുന്ന ആഘോഷമൈതാനം പോലൊരു നഗരം. തല്ലുമാല തിയേറ്ററിലൊരുക്കിയ ആഘോഷക്കാഴ്ചകളിൽ നിന്ന് ടൊവിനോ തോമസ് നേരെ പുലിമടയിലേക്ക് വന്നുകയറി. പുലിവരയുടെ വിശേഷങ്ങൾ ചോദിച്ചറിഞ്ഞ് പുലിത്താളം ചവിട്ടി പുലികൾക്കൊപ്പം ടൊവിനോ...

- വി.പ്രവീണ

"ങ്ങോട്ടാ ക്ടാവേ ...." കാടു വിറപ്പിക്കുന്ന പുലിയെ ഒന്ന് തൊട്ടു തോണ്ടി ഇങ്ങനൊരു വർത്തമാനം പറയാൻ മോഹമുണ്ടെങ്കിൽ നാലാം ഓണത്തിന് തൃശ്ശൂർ പട്ടണത്തിലേക്ക് ചെന്നാൽ മതി. തിക്കിത്തിരക്കിപ്പായുന്ന പുലികൾ ന്തൂട്ടാ ഇഷ്ടാന്ന് ചോദിച്ച് ആ വഴിയീവഴി വാലുകുലുക്കി പായും. അടുത്ത ച ങ്ങാതിയെ അരികിൽ കണ്ടപോ ലെ "ന്നീ പോയേ ഗ' എന്നും പറഞ്ഞ് ചിലപ്പോൾ അവരൊന്ന് ശാസിച്ചെന്നും വരും. അതുമല്ലെങ്കിൽ "ദേ പോണു കന്നാലി' എന്ന മട്ടിൽ ചെറുതായൊന്ന് കളിയാക്കിയേക്കും.

കരിയും കരിമരുന്നും, പൂരവും പുലികളിയും ആഘോഷ കടലായിരമ്പുന്ന ആരവപ്പറമ്പാണ് തൃശ്ശൂർ. നാലാം ഓണത്തിന് തൃശ്ശൂരിലേക്കിറങ്ങിയാൽ മനുഷ്യർ പുലികളായി മാറുന്ന അപൂർവകാഴ്ച കാണാം. അരമണി കിലുക്കി മേലാസകലം പുള്ളിയും വരയും നിറച്ച് അവരങ്ങനെ ആടിത്തിമർക്കും. അതിനു മുമ്പ് പുലിമടയൊരുങ്ങും. നിറങ്ങളും ആരവങ്ങളും ആർപ്പുവിളികളും നേരിൽ കണ്ടറിയാൻ 'ഗൃഹലക്ഷ്മി'യുടെ ക്ഷണം സ്വീകരിച്ച് ടൊവിനോ പുലിമടയിലേക്കെത്തി.

“തല്ലുമാല'യുടെ പ്രമോഷൻ തിരക്കുകൾക്കിടയിൽ പുലിമടയ്ക്കുള്ളിലെ കാഴ്ചകൾ കണ്ടറിയാനുളള വരവ്. തൃശ്ശൂരിന്റെ തുടിപ്പുനിറയുന്ന തൃപുടതാളത്തിന്റെ അകമ്പടിയിൽ മുഷ്ടി ചുരുട്ടി ഇടതുകൈ മുകളിലേക്കുയർത്തി വലതുകാൽ മുന്നോട്ട് വച്ച് പുലികൾ ടൊവിനോയെ വരവേറ്റു. വയറിലാണ് പുലിമുഖം വിരിയുക. മനുഷ്യർ പുലിയായി മാറുന്ന മായക്കാഴ്ചയുടെ വിശേഷങ്ങൾ ചോദിച്ചറിയുമ്പോൾ ടൊവിനോയുടെ കണ്ണുകളിൽ "മായാനദി'യിലെ മാത്തന്റെ കൗതുകം. “വലിയ വയറുള്ളവർക്ക് ഡിമാന്റ് കൂടുതലാണ്. അവരാണ് പുലികളിയിലെ സൂപ്പർസ്റ്റാറുകൾ...''കൂട്ടത്തിലെ ചേറൂർ ഗോപിപ്പുലിയുടെ കമന്റ് കേട്ട് ടൊവിനോ സ്വന്തം ശരീരത്തിലേക്കൊന്നു കണ്ണോടിച്ചു. ആ നോട്ടത്തിൽ ടൊവിനോ തല്ലുമാല'യിലെ വസീമായി. “കാര്യല്യഷ്ടാ... കുംഭവേണം കുംഭ പുറകിൽ നിന്ന് ജെയ്സൺപുലി ചെറുതായൊന്ന് മുരണ്ടു.