അക്ഷരങ്ങൾ സമ്മാനിച്ച ആകാശത്ത്

അനാഥത്വത്തിൽ നിന്ന് അക്ഷരങ്ങളുടെ കൈ പിടിച്ച് ഷെമി താണ്ടിയ ദൂരം ചെറുതല്ല. കടന്നു പോയ കെട്ടകാലം ഉയരങ്ങൾ കീഴടക്കാനുള്ള ഊർജമായത് എങ്ങനെയെന്ന് അവർ പറയുന്നു...

- ആഷിക്ക്. കെ.പി

ജനിച്ചു വീണ ദാരിദ്ര്യത്തിൽ ജീവിതം ഹോമിക്കില്ല. ഒന്നുമില്ലെന്നും ആരും കൂടെയില്ലെന്നും തോന്നിയ ഘട്ടത്തിൽ ഷെമി എടുത്ത പ്രതിജ്ഞയാണത്. കണ്ണൂരിലെ തെരുവുകളിൽ ബാപ്പയോടൊപ്പം ആക്രി സാധനങ്ങൾ ശേഖരിച്ചു വിറ്റു നടന്നിരുന്ന പെൺകുട്ടിയായിരുന്നു അന്നവൾ. ക്ഷീണിച്ച് തളരുമ്പോൾ ബാപ്പ അവളോട് പറയും: “മോള് പഠിക്കണം. ആ ലൈബ്രറിയിലിരുന്ന് ഇഷ്ടം പോലെ വായിച്ച് വലുതാകണം.'' പിന്നീട് ഉമ്മയും ബാപ്പയും ദാരിദ്ര്യം കൊണ്ടും രോഗം കൊണ്ടും ഈ ലോകത്തോട് വിടപറഞ്ഞപ്പോഴാണ് അനാഥത്വം എത്ര വലുതാണ് എന്ന് മനസ്സിലായത്. “ആരെയും ആശ്രയിക്കാതെ ജീവിക്കണം. പഠിച്ച് വലിയ ആളാവണം.'' അവളൊരു പ്രതിജ്ഞയെടുത്തു. കൂടപ്പിറപ്പുകളെയും കൂട്ടി കോഴിക്കോട്ടേക്ക് ബസ്സ് കയറുമ്പോൾ അനാഥാലയം എന്നത് എവിടെ നിന്നോ കേട്ട ഒരു കച്ചിത്തുരുമ്പായിരുന്നു മനസ്സിൽ. ഇന്നവൾ അനാഥയല്ല. അക്ഷരങ്ങളുടെ കൈപിടിച്ച് ഷെമി താണ്ടിയ ദൂരങ്ങളേറെ. പ്രവാസി എഴുത്തുകാരി, പ്രഭാഷക, സാംസ്കാരിക പ്രവർത്തക... എന്നിങ്ങനെ അവർക്കിന്ന് വിശേഷണങ്ങൾ ഏറെ. ഒട്ടേറെ പതിപ്പുകൾ വിറ്റഴിഞ്ഞ ഒന്നാമത്തെ നോവലിനു തന്നെ ഏറെ പുരസ്കാരങ്ങൾ ലഭിച്ച എഴുത്തുകാരിയാണ്. നടവഴിയിലെ നേരുകൾ, മലപ്പുറത്തിന്റെ മരുമകൾ, കബന്ധ നൃത്തങ്ങൾ തുടങ്ങി അനേകം കൃതികൾ രചിച്ച എഴുത്തുകാരി...

ദാരിദ്ര്യം നിറഞ്ഞ ജീവിതം