കാവലാകാൻ ഒരു കനൽത്തരി

രാജ്യത്തിന്റെ പരമോ ന്നത പദവിയിലേക്ക് ദ്രൗപദി മുർമു നടന്നു കയറുമ്പോൾ അത് അടിച്ചമർത്തപ്പെട്ട മനുഷ്യരോടുള്ള കടം വീട്ടൽ കൂടിയാവും.

- മനോജ് മേനോൻ

ദ്രൗപദി സഹനങ്ങളുടെ പ്രതീകമാണ്; പുരാണത്തിലായാലും ജീവിതത്തിലായാലും. അപമാനിക്കപ്പെട്ടും അവഗണിക്കപ്പെട്ടും മുറിവുകളുടെ അരികുകളിൽ പൊടിയുന്ന ചോരത്തുള്ളികളിൽ നനഞ്ഞും, ദുരിതങ്ങളിൽ ഇടറിയും വീഴാതെ മുന്നോട്ടുനീങ്ങിയും രൂപപ്പെടുന്ന പെൺജീവിതങ്ങളുടെ നിത്യപ്രതീകം. സ്വാതന്ത്ര്യത്തിന്റെ എഴുപത്തിയഞ്ച് വർഷങ്ങൾ പിന്നിടുമ്പോഴും മനുഷ്യരായി മുഖ്യധാരാ മാനദണ്ഡങ്ങൾ സമ്മതിക്കാത്ത ഉത്തരേന്ത്യയിലെ പാർശ്വവൽക്കരിക്കപ്പെട്ട ഗോത്രദളിത് വിഭാഗങ്ങളിൽ ഇരുചെവി അറിയാതെ എരിഞ്ഞുവീഴുന്നവരുടെ ജീവചരിത്രങ്ങൾ കൂടിയാണ് അത്. രാജ്യത്തിന്റെ പരമോന്നത പദവിയിലേക്കുള്ള മത്സരത്തിൽ ദ്രൗപദി മുർമു നിയോഗിക്കപ്പെടുമ്പോൾ ഈ മനുഷ്യ സഹനങ്ങളാണ് പൊതുബോധത്തിന് മുന്നിൽ ഒരിക്കൽ കൂടി നടന്നെത്തുന്നത്. “പാവപ്പെട്ട കുടുംബത്തിൽ നിന്നാണ് ഞാൻ വരുന്നത്. പട്ടിണിക്കിടയിലാണ് ജനിച്ചതും വളർന്നതും. പഠിച്ച് സ്ഥിരവരുമാനമുള്ള ഒരു ജോലി കിട്ടണമെന്ന് മാത്രമേ ഞാൻ ആഗ്രഹിച്ചിട്ടുള്ളൂ. രാഷ്ട്രീയത്തിൽ ഇറങ്ങുമെന്നും ഇത്രയും വലിയ പദവികളിൽ പരിഗണിക്കപ്പെടുമെന്നും ഒരിക്കൽ പോലും ചിന്തിച്ചിട്ടില്ല. രാഷ്ട്രപതി സ്ഥാനാർഥിയായി എൻ.ഡി.എ നിശ്ചയിച്ചപ്പോൾ ഒഡീഷയിലെ ഉൾഗ്രാമമായ മയൂർഭഞ്ജിൽ വച്ച് ദ്രൗപദി പ്രതികരിച്ചത് ഇങ്ങനെയാണ് കടന്നു പോന്ന വഴികളുടെ ഉള്ളടക്കം നിറഞ്ഞ ചെറുവാക്കുകൾ ആഹ്ലാദത്തിന്റെ വലിയ സമുദ്രങ്ങളാകാതെ, അനുഭവങ്ങളാൽ നിർമിക്കപ്പെട്ട ചെറുതടാകമായി തളം കെട്ടിക്കിടക്കുകയായിരുന്നു.

അപ്രതീക്ഷിതമായി പൊട്ടിപ്പുറപ്പെടുകയും ആഘാതമാവുകയും ചെയ്ത അനുഭവങ്ങളുടെ തീക്ഷ്ണകാലം തീർത്ത അമ്പരപ്പിന്റെ അലകളും അതിലുണ്ടായിരുന്നു. യുവാക്കളായ രണ്ട് മക്കളുടെ മരണം. തൊട്ടു പിന്നാലെ ഭർത്താവിന്റെയും അമ്മയുടെയും സഹോദരങ്ങളുടെയും മരണങ്ങൾ. “ഞാൻ ജീവിതത്തിൽ പല ഉയർച്ച താഴ്ചകളും കണ്ടിട്ടുണ്ട്. 2009-ൽ മൂത്ത മകൻ ലക്ഷ്മണിനെ നഷ്ടപ്പെട്ടു. ഞാൻ തകർന്നു പോയി. മകന്റെ മരണത്തിനു ശേഷം ഉറക്കമില്ലാത്ത രാത്രികളായിരുന്നു എനിക്ക്. ഇതിൽ നിന്ന് പതുക്കെ മോചിതയാകുമ്പോൾ 2013-ൽ രണ്ടാമത്തെ മകൻ ഒരു വാഹനാപകടത്തിൽ മരിച്ചു. തൊട്ടുപിന്നാലെ അമ്മയും സഹോദരനും മരിച്ചു. 2014-ൽ ഭർത്താവ് ഹൃദയാഘാതത്തെത്തുടർന്ന് മരിച്ചു.'' ഈ മരണ പരമ്പരകൾക്കിടയിൽ പകച്ചു പോയ ദ്രൗപദി മുർമു വിഷാദത്തിന്റെ കൈപ്പിടിയിൽ അകപ്പെട്ടു. വിഷാദം തരണം ചെയ്യാൻ യോഗയും ധ്യാനവും കൗൺസിലിങ്ങും തുടർന്നു. ഗ്രാമങ്ങൾ തോറും സഞ്ചരിച്ചു.