ദുഷ്ടതകൾ നിവാരണം ചെയ്യുന്ന പുണ്യമാസം

മിഥുനം വന്നാൽ ദുരിതം വന്നു, കർക്കിടകം കഴിഞ്ഞാൽ ദുർഘടം തീർന്നു എന്നാണ് പഴമക്കാർ പറയാറ്. പഞ്ഞമാസമെന്നറിയപ്പെട്ടിരുന്ന കള്ള കർക്കിടകത്തെ പണ്ട് പലർക്കും ഭയമായിരുന്നു. എന്നാൽ ഇപ്പോൾ അത് പുണ്യദായകമായ രാമായണമാസമായി മാറി. രാമനാമ ജപത്തിലൂടെ സമസ്ത ദുരിതങ്ങളിൽ നിന്നും വിമോചനം നേടാം എന്ന് വിശ്വസിക്കുന്ന ഒരു ജനതയുടെ മനസ്സാണ് കർക്കിടക മാസത്തെ രാമായണ മാസമാക്കി തീർത്തത്.

- ബാബുരാജ് പൊറത്തിശ്ശേരി

രാമായണപാരായണം, രാമായണശ്രവണം തുടങ്ങിയവ ഇരുമാർഗ്ഗങ്ങളാണെങ്കിൽ രാമായണ കഥാപാത്ര ദർശനം മോക്ഷകവാടമാകുന്നു. അതിനെത്തുടർന്നാണ് നാലമ്പല ദർശനത്തിന് പ്രാധാന്യം ലഭിച്ചതും. പുതുവർഷത്തിൽ ഉത്തമജീവിതം നയിക്കാനുള്ള തയ്യാറെടുപ്പായും ഈ രാമായണ മാസത്തെ ആചരിക്കാം. തൃപയാർ ശ്രീരാമനും, ഇരിങ്ങാലക്കുട ഭരതനും മൂഴിക്കുളത്ത് ലക്ഷ്മണനും പായമ്മൽ ശത്രുഘ്നനും വാണരുളുന്ന ക്ഷേത്രങ്ങളിലേക്ക് തീർത്ഥാടനം ചെയ്യുന്നതിനെയാണ് നാലമ്പല ദർശനം എന്നുപറയുന്നത്.

രാമായണധ്വനിയും, ഗണപതിഹോമവും ത്രികാല പൂജയും നിറഞ്ഞുനിൽക്കുന്ന കർക്കിടകത്തിൽ മംഗല്യവതികളും കന്യകമാരും എല്ലാദിവ സവും തലമുടിയിൽ ദശ പുഷ്പം ചൂടണമെന്നത് നിർബന്ധമാണ്. എന്നും രാവിലെ കുളി കഴിഞ്ഞ് കണ്ണെഴുതി ചാന്ത് ചാർത്തി ചന്ദനം തൊട്ട് ദശപുഷ്പം ചൂടി ശ്രീഭഗവതിയുടെ പ്രതിരൂപം എന്നപോലെ മംഗല്യവതികൾ ഒരുങ്ങണം.

കർക്കിടകത്തിൽ കല്യാണം ആകാമോ?

പൊതുവെ കർക്കിടകത്തിൽ കല്യാണം നടത്താറില്ല. എത്ര സമയമില്ലെങ്കിലും കർക്കിടമാസത്തിൽ കല്യാണം നടത്തുന്നതിനോട് മുൻതലമുറയ്ക്ക് താൽപ്പര്യമില്ലായിരുന്നു. മലയാള മാസങ്ങളിൽ പന്ത്രണ്ടാമത്തേതും അവസാനത്തേതുമായ കർക്കിടകമാസത്തെ കള്ളക്കർക്കിടകമെന്നാണ് പണ്ട് വിശേഷിപ്പിച്ചിരുന്നത്. ഈ പ്രയോഗത്തിൽ നിന്നുതന്നെ എന്തോ ഒന്ന് ഇതിനുപിന്നിൽ ഒളിച്ചിരിക്കുന്നുവെന്ന് ബോധ്യമാകും.

കർക്കിടകത്തിനു ശേഷം വരുന്ന മാസം നറുനിലാവിന്റെ കുളിർമ്മ പോലെ ചിങ്ങമാണെന്നതും അതിനാൽ പ്രസ്തുത മാസത്തിലാകാം കല്യാണമെന്നുമാണ് സങ്കൽപ്പം. കല്യാണമെന്നല്ല പല പ്രധാനപ്പെട്ട ചടങ്ങുകളും കർക്കിടകത്തിൽ നിന്നും ഒഴിവാക്കിയിരുന്നു.

വിവാഹമെന്നാൽ മാനസികമായും ശാരീരികമായും ഏറെ ബദ്ധപ്പാടുള്ള ഒന്നാണ്. അതിനാൽ ഇതിന് കൂടുതൽ ശ്രദ്ധ ആവശ്യമാണ്. കർക്കിടകമാസത്തിൽ പൊതുവെ പ്രകൃതി പ്രതികൂലമായതിനാൽ ആരോഗ്യവിഷയത്തിൽ കൂടുതൽ ശ്രദ്ധിക്കേണ്ടതുണ്ട്. അതായത് ആരോഗ്യപരമായി ഈ മാസം അത്ര നല്ലതല്ലാത്തതു കൊണ്ടാണ് കർക്കിടകത്തിൽ കല്യാണം പാടില്ലെന്ന് ആചാര്യന്മാർ വിധിയെഴുതിയത്.

മോക്ഷം ലഭിക്കുവാൻ വേണ്ടി ഈശ്വരപ്രാർത്ഥനകളിൽ മുഴുകുമ്പോൾ മറ്റുപല ആഘോഷങ്ങളും മാറ്റിവയ്ക്കുക തന്നെ വേണം. ഒരു പക്ഷേ ഈ മോക്ഷലക്ഷ്യത്തെ തിരിച്ചറിഞ്ഞതിനാലാവാം കർക്കിടകം ആഘോഷങ്ങളിൽ നിന്ന് മാറിനിന്നത്.