മുൻധാരണകളെ തിരുത്തുന്ന ദൈവവിധി

ഇങ്ങനെ കാര്യങ്ങൾ എല്ലാം വിധിപോലെ മാത്രമേ നടക്കൂ എന്നതിന് ധാരാളം ഉദാഹരണങ്ങൾ നമ്മുടെ ഇതിഹാസങ്ങളിൽ തന്നെയുണ്ട്.

- സംഗീത മധു

പതിനാല് വർഷത്തെ നീണ്ട വനവാസത്തിനു ശേഷം ശ്രീരാമൻ അയോദ്ധ്യയിലേക്ക് മടങ്ങിയെത്തിയ സമയം. വസിഷ്ഠ മഹർഷിയും കൊട്ടാരത്തിലെ അന്തേവാസികളും അദ്ദേഹത്തിന്റെ പട്ടാഭിഷേകത്തിനുള്ള തയ്യാറെടുപ്പുകൾ തകൃതിയായി ആരംഭിച്ചു.

പട്ടാഭിഷേകത്തിന് മുന്നോടിയായി മാത്രമല്ല, രാമ രാവണയുദ്ധത്തിന്റെ ഫലമായി അനേകം ജീവനുകൾ ബലിയായതിന്റെ പാപത്തിൽ നിന്നും രാമനെ വിമോചിപ്പിക്കുവാനുള്ള എല്ലാവിധത്തിലുള്ള ദാനധർമ്മങ്ങൾക്കുള്ള ഏർപ്പാടുകൾ വസിഷ്ഠമഹർഷി ചെയ്തുവരികയായിരുന്നു. അതിൽ പങ്കുകൊള്ളുവാൻ കൊട്ടാരത്തിലേക്ക് വൻ ജനപ്രവാഹം തന്നെയുണ്ടായി.

വസിഷ്ഠ മഹർഷിയുടെ നിർദ്ദേശപ്രകാരം ചെയ്ത ദാനങ്ങളിൽ ഒന്ന് എള്ളായിരുന്നു. മറ്റെല്ലാ ദാനങ്ങളും സ്വീകരിക്കാൻ ധാരാളം ആളുകൾ എത്തിയിരുന്നെങ്കിലും എന്തുദാനം മാത്രം സ്വീകരിക്കാൻ ആരും തയ്യാറായില്ല. അതിനാൽ വസിഷ്ഠർ ഒരു അറിയിപ്പ് പുറപ്പെടുവിച്ചു.

"എള്ള് സ്വീകരിക്കുന്നവർക്ക് അതിനൊപ്പം സ്വർണ്ണക്കട്ടികളും നൽകപ്പെടുന്നതാണ്.

ഈ ദാനകർമ്മ സമയത്ത് അയോദ്ധ്യയുടെ അതിർത്തി ഗ്രാമത്തിൽ ശിങ്കാരമുനിയും പത്നിയും ദാരിദ്ര്യത്തിൽ ജീവിച്ചുവന്നിരുന്നു. ജപം, ധ്യാനം, പ്രാർത്ഥന തുടങ്ങിയ ആത്മീയപാതയിൽ മനഃസമാധാനത്തോടെ ജീവിക്കുകയായിരുന്നു മുനിദമ്പതികൾ.