മങ്കമാർ മകം തൊഴുന്നു പുരുഷന്മാർ പൂരം തൊഴുന്നു

ചോറ്റാനിക്കര അമ്മയെ രാവിലെ ദർശിച്ചാൽ വിദ്യാലബ്ധിയും, ഉച്ചയ്ക്ക് ദർശിച്ചാൽ ദുരിതനാശവും, വൈകിട്ട് ദർശിച്ചാൽ ദുഃഖശമനവും ഫലമുള്ളതായാണ് വിശ്വാസം.

- പി. ജയചന്ദ്രൻ

ചോറ്റാനിക്കര ക്ഷേത്രത്തിന് മറ്റൊരു ക്ഷേത്രത്തിലും കാണുവാൻ കഴിയാത്ത ഒരു പ്രത്യേകതയുണ്ട്. ആശ്രിതവത്സലയും ഇഷ്ടവരദായിനിയുമായ ഇവിടുത്തെ ദേവി ഒരേദിവസം തന്നെ വ്യത്യസ്തങ്ങളായ മൂന്ന് രൂപഭാവങ്ങളിലാണ് ഭക്തർക്ക് ദർശന പുണ്യം നൽകുന്നത്. പ്രഭാതത്തിൽ വെള്ള വസ്ത്രം ധരിച്ച് കൊല്ലൂർ മൂകാംബികാഭാവത്തിൽ മഹാസരസ്വതിയായും, ഉച്ചയ്ക്ക് ചുവപ്പ് വസ്ത്രം ധരിച്ച് ഭദ്രകാളിയായും, വൈകിട്ട് നീലവസ്ത്രം ധരിച്ച് ദുർഗ്ഗാ പരമേശ്വരി ഭാവത്തിലുമാണ് ദേവിയുടെ ദർശനസായൂജ്യം ഭക്തർക്ക് ലഭി ക്കുന്നത്. ഈവിധം എല്ലാ പ്രധാനഭാവങ്ങളിലും ആരാധിക്കപ്പെടുന്നതിനാൽ ചോറ്റാനിക്കര അമ്മയെ ആദിപരാശക്തിയായാണ് ആരാധിക്കപ്പെടുന്നത്.

ശബരിമലയും ഗുരുവായൂരും കൊടുങ്ങല്ലൂരും കഴിഞ്ഞാൽ ഏറ്റവുമധികം ഭക്തർ ദർശനത്തിനെത്തുന്ന ചോറ്റാനിക്കര ക്ഷേത്രം നൂറ്റെട്ട് ദുർഗ്ഗാക്ഷേത്രങ്ങളിൽ ഒന്നാണെന്നാണ് വിശ്വാസം. ചോറ്റാനിക്കര ഭഗവതിക്ഷേത്രം എന്നാണ് വിളിപ്പേരെങ്കിലും, മഹാലക്ഷ്മിക്കൊപ്പം തുല്യപ്രാധാന്യത്തോടെ മഹാവിഷ്ണു ക്ഷേത്ര വിനേയും പ്രതിഷ്ഠിച്ചിട്ടുള്ളതിനാൽ ലക്ഷ്മിനാരായണ സങ്കൽപ്പത്തിലാണ് ക്ഷേത്രത്തിലെ ആരാധന. മഹാ ദേവ സാന്നിധ്യം ഉള്ളതിനാൽ ചോറ്റാനിക്കര അമ്മയെ പാർവ്വതിയായും സങ്കൽപ്പിച്ചു പോരുന്നു.

ക്ഷേത്രോൽപ്പത്തി

 അദ്വൈത സിദ്ധാന്തത്തിന്റെ പ്രയോക്താവായ ആദിശങ്കരനുമായി ബന്ധപ്പെട്ടതാണ് ചോറ്റാനിക്കര ക്ഷേത്രത്തിന്റെ ഉത്പത്തി ചരിത്രം.

 ആദ്ധ്യാത്മിക ചിന്തയിലും വിദ്യാസമ്പന്നതയിലുമൊക്കെ പുകൾപെറ്റതാണെങ്കിലും തന്റെ ജന്മനാട്ടിൽ വിദ്യാദേവതയായ സരസ്വതിക്ക് ഒരു ക്ഷേത്രം ഇല്ല എന്നുള്ളത് ശങ്കരാചാര്യരുടെ ഒരു വലിയ ദുഃഖം ആയിരുന്നു. അതിനൊരു പരിഹാരം തേടി ദേവപ്രീതിക്കായി അദ്ദേഹം കുടജാദ്രിയിൽ പോയി തപസ്സിരുന്നു. ഏറെക്കാലത്തെ കഠിനത പസ്സിനൊടുവിൽ തപസ്സിൽ സംപ്രീതനായ സരസ്വതിദേവി ശങ്കരാചാര്യർക്ക് മുന്നിൽ പ്രത്യക്ഷപ്പെട്ടപ്പോൾ അദ്ദേഹം തന്റെ ആഗ്രഹം ദേവിക്ക് മുന്നിൽ ഉണർത്തിച്ചു. എന്നാൽ തന്റെ വാസസ്ഥാനമായ കൊല്ലൂർ മൂകാംബികാക്ഷേത്രം വിട്ടുപോകുവാൻ വിസമ്മതിച്ച ദേവി ഒടുവിൽ ഭക്തനായ ശങ്കരാചാര്യരുടെ ആഗ്രഹം സഫലീകരിച്ചു കൊടുക്കുവാൻ തീരുമാനിച്ചു.