பகவானின் முதல் தொண்டனை வணங்குவோம்!

நாகபஞ்சமி - ஜூலை 29,2025

- 

ஆடி மாதத்தில் கருட பஞ்சமி, நாக பஞ்சமி, நாக சதுர்த்தி வருகிறது.

இந்த விசேஷங்களில் பெரிய திருவடியான கருடனையும், நாகங்களையும் நினைத்து வழிபட வேண்டும். நாக சதுர்த்தி / பஞ்சமி அன்று கிராமத்தில் புற்று மாரியம் மண் கோயில்களுக்குச் சென்று நாகங்களை வழிபடுகின்றார்கள். நாகங்களை வழிபடுவது ஆதிகாலத்திலிருந்து மக்கள் செய்து வரும் வழிபாடு. அதுவும் எளிய மக்களின் வழிபாடு.

இந்தக் கட்டுரையில் நாக பஞ்சமி / சதுர்த்தியை முன்னிட்டு, நாகங்களின் தலைவனான ஆதிசேஷனைப் பற்றித் தெரிந்து கொள்வோம்.

பகவானைப் பிரியாதவன்

பகவான் தன்னோடு பிரியாமல் வைத்துக் கொள்வது இரண்டு பேரை. ஒன்று மகாலட்சுமித் தாயாரை. “ஒரு நொடியும் பிரியாள்” என்பதுபோல, பகவானுடைய திருமார்பிலே எழுந்தருளி இருப்பவள் மகாலட்சுமி. அதனால்தான் பெருமாளுக்கே திருமால் என்று பெயர். திரு இல்லாத மால் இருக்க முடியாது.

பகவானுக்கு திருமாமகள் செல்வன், திருவாழ்மார்பன், ஸ்ரீநிவாசன் என்றெல்லாம் திருப்பெயர்கள் உண்டு. அதைப் போலவே பகவானைப் பிரியாமல் இருக்கக் கூடிய நித்யசூரிகள் ஒருவர் அனந்தன் என்று அழைக்கப்படும் ஆதிசேஷன்.

விண்ணாடு என்று சொல்லப்படும் பரமபதத்தில் நித்திய கைங்கரியம் செய்யக்கூடிய ஆத்மாக்களை நித்யசூரிகள் என்று அழைப்பார்கள். அதன் வரிசையைச் சொல்லுகின்ற பொழுது அனந்த, கருட, விஷ்வக்சேனர் என்று சொல்வார்கள். இந்த வரிசையில் முதலாவதாக வருபவர் ஆதிசேஷன்தான்.

முதல் தொண்டன்

தலைவனை சேஷி என்றும், தொண்டனை சேஷன் என்றும் குறிப்பிடும் வழக்கம் வைணவத்தில் உண்டு.

பகவானுக்கும் உயிர்களுக்கும் உள்ள தொடர்பினை சேஷ - சேஷி பாவம் என்பார்கள். ராமானுஜரின் விசிஷ்டாத்வைதம் இந்த சேஷ - சேஷி பாவம்தான்.

கருடன், பகவானுடைய புறப்பாட்டின் போது வருவார். “**பறவை ஏறும் பரம் புருடா**” என்று அப்பொழுது பகவானை மங்களாசாசனம் செய்வார்கள். இது கருடனுக்கு பெருமை.

ஆனால் மற்ற நேரத்தில் அவர் பெருமாளுக்கு எதிரிலே, பெருமாள் எப்போது அழைப்பாரோ என்று தயார் நிலையில் கைகூப்பி நிற்பார். இதைத்தான் பல சந்நதிகளில் காண்கின்றோம்.