முடிவுக்கு வராத சிக்கல்கள்

மத்திய கிழக்குப் போர் ஒரு வழியாக முடிவுக்குக் கொண்டு வரப்பட்டிருக்கிறது. இந்தப் போர் நீண்டு சென்றிருக்குமேயானால், அதன் தாக்கம் இலங்கைக்கு அதிகமாகவே இருந்திருக்கும். ஏனென்றால், பாதுகாப்பு, பொருளாதாரம், பூகோள அரசியல் மற்றும் சர்வதேச இராஜதந்திர ரீதியாக, இந்தப் போர் அரசாங்கத்துக்குச் சவாலான ஒன்றாக இருந்தது. 12 நாள் போரை முடிவுக்குக் கொண்டுவருவதற்கு அமெரிக்காவும் இஸ்ரேலும் எடுத்த முடிவு தவிர்க்க முடியாத ஒன்றாகவே இருந்தது.

- ஹரிகரன்

ஏனென்றால் இந்தப் போர் எல்லாத் தரப்புகளினதும் பலம், பலவீனங்களை வெளிக்காட்டியிருக்கிறது. ஈரானின் வான்படை மற்றும் வான் பாதுகாப்பு என்பன பலவீனமானவை. ஆனால், அதன் வசமுள்ள ஏவுகணைகள் மிக வலிமையானவை.

ஈரான் அணுகுண்டுகளைத் தயாரிக்கும் வல்லமை பெற்றிருக்கிறதோ இல்லையோ, அதனை அழிப்பதற்கெனத் தொடங்கப்பட்ட போருக்கு இரண்டு முக்கியக் காரணங்கள் இருந்தன.

ஒன்று, ஈரானின் ஏவுகணை பலம். இன்னொன்று, ஆட்சி மாற்றத்தை ஏற்படுத்துவது.

ஈரானில் ஆட்சியில் உள்ள இஸ்லாமிய ஆட்சியை அகற்றிவிட்டு, மீண்டும் மன்னர் ஆட்சியையோ, ஜனநாயக ஆட்சியையோ கொண்டுவருவது அமெரிக்கா மற்றும் இஸ்ரேலின் திட்டம்.

ஒரு கட்டத்தில் இதனை இரண்டு நாடுகளும் வெளிப்படுத்தியும் இருந்தன.

ஆனால், 12 நாட்கள் தொடர்ந்த போரின்போது, அவர்கள் எதிர்பார்த்த இலக்குகளை அடைந்துவிட்டதாகத் திருப்திப்பட முடியாது. ஈரானின் ஏவுகணைப் பலம் தொடர்பாக அமெரிக்காவும் இஸ்ரேலும் தப்புக்கணக்குப் போட்டுவிட்டன.

ஈரானின் அதிநவீன ஏவுகணைகள் துல்லியமாக இலக்குகளைத் தாக்கவில்லை.

ஆனால், அவை அமெரிக்கா மற்றும் இஸ்ரேலின் வான் பாதுகாப்புக் கவசத்தை உடைத்துக்கொண்டு ஊடுருவக்கூடியவை என்பது உறுதியாகிவிட்டது.

இதனால், அமெரிக்கா தற்போது, தனது 175 பில்லியன் டொலர் முதலீட்டில், 'கோல்டன் டோம்' வான் பாதுகாப்புத் திட்டத்தைத் துரிதமாகச் செயல்படுத்த வேண்டிய நிலைக்குத் தள்ளப்பட்டிருக்கிறது.

ஏனென்றால், இஸ்ரேல் பயன்படுத்திய 'அயன் டோம்' அமெரிக்கா பயன்படுத்திய 'தாட்' போன்ற ஏவுகணைத் தடுப்புப் பொறிமுறைகளால், ஈரானின் ஹைப்பர்சொனிக் பலிஸ்டிக் ஏவுகணைகளைத் தடுக்க முடியவில்லை.

தாக்குதல் தொடங்கப்பட்ட போது 2,500 ஏவுகணைகள் வரை ஈரானிடம் இருந்ததாக அமெரிக்கஇஸ்ரேலியப் புலனாய்வாளர்கள் மதிப்பீடு செய்திருந்தார்கள்.

அவற்றில் கிட்டத்தட்ட 500 ஏவுகணைகளையே இஸ்ரேல் மீது ஈரான் ஏவியது.

ஆனாலும், ஈரானின் தாக்குதல் நடந்த ஒவ்வொரு இரவும், அதனைத் தடுப்பதற்காக, இஸ்ரேல் 250 மில்லியன் டொலர்களை ஏவுகணைத் தடுப்பு நடவடிக்கைகளுக்காகச் செலவிட வேண்டியிருந்தது.