பெருந்தோட்ட மக்களின் சம்பள உயர்வு, 10 பேர்ச் காணி: பேச்சளவில் இல்லாமல் நடைமுறைக்கு வர வேண்டும்!

பெருந்தோட்ட மக்களின் பொருளாதார நெருக்கடி நாளுக்கு நாள் அதிகரித்து வருகின்றது.

- பெ. முத்துலிங்கம்

ஜனாதிபதி அனுர குமார திசாநாயக்க கடந்த நவம்பர் மாதம் வரவு செலவுத் திட்டத்தில் அறிவித்த சம்பள உயர்வு அரசாங்க ஊழியர்களுக்கு ஏப்ரல் மாத சம்பளத்துடன் கிடைத்துள்ளது. ஓய்வூதியம் பெறுவோருக்கு எதிர்வரும் ஜூலை மாதத்திலிருந்து அதிகரிக்கப்படவுள்ளது. ஆனால், பெருந்தோட்டத் தொழிலாளர்களுக்கு 1700 ரூபாவை அதிகரிக்க கம்பனிகளுக்கு அழுத்தம் கொடுத்து வருவதாகக் கூறப்படுகின்றதே தவிர, எத்தகைய அழுத்தம் என்று தெரியவில்லை.

முன்னாள் ஜனாதிபதி ரணில் விக்கிரமசிங்க கொட்டகலையில் நடைபெற்ற இ.தொ.கா.வின் மேதினக் கூட்டத்தில் தோட்டத் தொழிலாளர்களுக்கு நாளாந்த சம்பளத்தை 1700 ரூபாவாக அதிகரித்துக் கொடுக்க கம்பனிகளுக்கு அறிவுறுத்தல் வழங்கியும் கம்பனிகள் செவி சாய்க்கவில்லை. 1350 ரூபா மாத்திரமே கிடைத்த நேரத்தில், மேலும் 350 ரூபா பெற்றுக் கொடுக்க நடவடிக்கை எடுக்கப்படும் என இ.தொ.கா. அறிவித்திருந்த போதிலும், அடுத்தடுத்து வந்த தேர்தல்கள் அதற்கு இடம் கொடுக்கவில்லை.

வரவு செலவுத் திட்டத்தில் சம்பளம்

பெருந்தோட்ட மக்கள் வாழ்க்கைச் செலவை சமாளிக்க 2000 ரூபாவுக்கு மேல் சம்பள உயர்வு கிடைக்க வேண்டும் என தேசிய மக்கள் சக்தி எதிர்க்கட்சியில் இருந்த போது கூறி வந்தது. அதை நம்பி ஜனாதிபதித் தேர்தலிலும், பாராளுமன்றத் தேர்தலிலும் மலையக பெருந்தோட்ட மக்கள் வாக்குகளை வாரி வழங்கியிருந்தார்கள். எனினும் இரண்டு தேர்தல்கள் முடிந்த பின்னும் சம்பள உயர்வு எதுவும் கிடைக்கவில்லை. ஆனால், கடந்த ஆண்டு நவம்பர் மாதம் ஜனாதிபதி அநுர வரவு செலவுத் திட்டத்தை சமர்ப்பித்துப் பேசும் போது, பெருந்தோட்டத் தொழிலாளர்களுக்கு 1700 சம்பளம் கிடைக்க கம்பனிகளுக்கு அழுத்தம் தரப்படும் என்று கூறியிருந்ததமை அவர்களுக்கு மீண்டும் நம்பிக்கையை ஏற்படுத்தியிருந்தது.