உள்ளூராட்சித் தேர்தலில் மக்கள் வழங்கிய தீர்ப்பு! தலைமைகள் எடுக்க வேண்டிய தீர்மானங்கள் (2)

நடைபெற்று முடிந்த உள்ளூராட்சி மன்றத் தேர்தலில் நுவரெலியா மாவட்டத்தில் தனிப் பெரும்பான்மையுடன் ஆட்சியமைக்க முடியாத நிலையில் கூட்டணி அமைத்தே ஆட்சியமைக்க வேண்டிய நிலை சில சபைகளில் ஏற்பட்டுள்ளது. அதற்கான கலந்துரையாடல்களும் மந்திராலோசனைகளும் இடம்பெற்று வருவதாகத் தெரிகின்றது.

- பானா

கடந்த ஒன்றரை மாத காலமாக மேற்கொள்ளப்பட்ட தீவிர பிரசாரங்கள் முடிவுக்கு வந்து உள்ளூராட்சிமன்றங்களின் தேர்தல் முடிவுகள் வெளியிடப்பட்டுள்ளன. அரசாங்கத்தின் பெரும்பான்மை பலத்துக்கு அமைய அநேகமான இடங்களில் பெரும்பான்மை பலத்துடன் ஆட்சி அமைக்கும் நிலைமை உருவாகியுள்ளது. எனினும், எதிர்க்கட்சிகளின் கைகளும் ஓங்கி வந்துள்ளதை மறுக்க முடியாது.

2018 ஆம் ஆண்டு எல்லைகள் மீள்நிர்ணயம் செய்யப்பட்டு முதன்முறையாக வட்டார உறுப்பினர்கள், பட்டியல் உறுப்பினர்கள் அடங்கிய கலப்புமுறையில் தேர்தல் நடத்தப்பட்டபோது, பதற்றம் டைந்திருந்த மக்கள் இம்முறை நன்றாக சிந்தித்து வாக்களித்துள்ளார்கள். ஒரு காலத்தில் யானைக்கும், கைக்கும் வாக்களித்து பழக்கப்படிருந்த மக்கள் இப்போது எந்தச் சின்னத்தை வைத்தாலும் நிதானமாக வாக்களிப்பதில் சளைத்தவர்கள் அல்லர் என்பதை நிரூபித்து வருகின்றார்கள். நாடளாவிய ரீதியில் வாக்களிப்பு வீதம் குறைந்திருந்ததைப் போலவே, மலையகத்திலும் நிலைமை இருந்தது.

எனினும், தமது பிரதிநிதிகளை தெரிவு செய்துள்ளார்கள்.

கடந்த பாராளுமன்றத் தேர்தலில் 62% ஆக இருந்த ஆளுங்கட்சியின் செல்வாக்கு உள்ளூராட்சித் தேர்தலில் 43 வீதமாகக் குறைந்துள்ளது. அதே நேரம், 18% ஆக இருந்த ஐக்கிய மக்கள் சக்தியின் செல்வாக்கு 23 வீதமாக அதிகரித்துள்ளது. நாடளாவிய ரீதியில் தேசிய மக்கள் சக்தி 4,503,930 வாக்குகளோடு 3927 உறுப்பினர்களையும், ஐக்கிய மக்கள் சக்தி 2,258,480 வாக்குகளோடு 1767 உறுப்பினர்களையும், பொதுஜன பெரமுன 954,517 வாக்குகளோடு 742 உறுப்பினர்களையும், ஐக்கிய தேசியக் கட்சி 488,406 வாக்குகளோடு 381 உறுப்பினர்களையும், ஸ்ரீலங்கா முஸ்லிம் காங்கிரஸ் 139,858 வாக்குகளோடு 116 உறுப்பினர்களையும், இ.தொ.கா. 71,655 வாக்குகளோடு 54 உறுப்பினர்களையும் பெற்றுள்ளன.

ஜனாதிபதி மற்றும் பாராளுமன்றத் தேர்தல்களில் தேசிய மக்கள் சக்திக்கு வாக்களித்து வந்த வடக்கு, கிழக்கு மக்கள் இம்முறை தமது கட்சிகளுக்கு பிரதேச வேட்பாளர்களுக்கும் வாக்களித்து தமது ஒற்றுமையை வெளிப்படுத்தி அரசாங்கத்திற்கு ஒரு செய்தியைக் கூறியுள்ளார்கள்.