முத்தரப்பு சிக்கலுக்குள் எரிசக்தி பாதுகாப்பு

அமெரிக்கா, இந்தியா, சீனா ஆகிய மூன்று வல்லரசு நாடுகளுக்கும் இடையில், இலங்கையின் எரிசக்தி பாதுகாப்பு சிக்கிக் கொள்ளுகின்ற நிலை உருவாகியிருக்கிறது.

- ஹரிகரன்

அமெரிக்கா, இந்தியா, சீனா ஆகிய மூன்று வல்லரசு நாடுகளுக்கும் இடையில், இலங்கையின் எரிசக்தி பாதுகாப்பு சிக்கிக் கொள்ளுகின்ற நிலை உருவாகியிருக்கிறது.

தேசிய மக்கள் சக்தி அரசாங்கம் பதவிக்கு வந்த பின்னர், இந்த மூன்று நாடுகளுடனும் எரிசக்தி தொடர்பாக உடன்பாடுகளை செய்திருக்கிறது அல்லது பேச்சுக்களை நடத்தி இணக்கப்பாட்டை ஏற்படுத்தியிருக்கிறது.

ஜனாதிபதி அநுரகுமார திசாநாயக் கவின் சீனப் பயணத்தின் போது அம்பாந்தோட்டையில், சீனாவின் சினோபெக் நிறுவனம் 3.7 பில்லியன் டொலர் முதலீட்டில் எண்ணெய் சுத்திகரிப்பு ஆலை ஒன்றை அமைப்பதற்கு ஒப்பந்தம் செய்யப்பட்டு கொண்டது.

இந்தியப் பிரதமர் நரேந்திர மோடியின் கொழும்பு பயணத்தின் போது, திருகோணமலையில் ஐக்கிய அரபு எமிரேட்ஸ், இந்தியா ஆகிய நாடுகளுடன் இணைந்து எரிபொருள் சுத்திகரிப்பு மற்றும் விநியோகக் கேந்திரத்தை உருவாக்கும் ஒப்பந்தம் ஒன்று கைச்சாத்திடப்பட்டது.

அமெரிக்க ஜனாதிபதி டொனால்ட் ட்ரம்ப் அறிவித்துள்ள வரிகள் தொடர்பான பேச்சுக்குச் சென்ற இலங்கை குழுவினர் அமெரிக்காவிடம் இருந்து எரிபொருளை இறக்குமதி செய்வதற்கான சாத்தியம் குறித்து பேச்சுக்களை நடத்தியிருக்கின்றனர்.

இலங்கை ஒரு சிறிய தீவு. 21 மில்லியன் மக்களைக் கொண்ட நாடு.

இங்கே வரையறுக்கப்பட்டளவு எண்ணெய் தேவையே உள்ளது.

ஆனால், இதன் எரிசக்தி கட்டமைப்பை தங்கள் கட்டுப்பாட்டில் கொண்டு வருவதற்கு மும்முனைப் போட்டி ஏற்பட்டிருக்கிறது.

இந்தியாவின் லங்கா ஐ.ஓ.சி. நிறுவனம் திருகோணமலையில் எரிபொருள் களஞ்சியங்களையும் எரிபொருள் சுத்திகரிப்பு வசதிகளையும் கொண்டிருக்கிறது.

அந்நிறுவனத்திற்கு 213 எரிபொருள் விற்பனை நிலையங்களும் இருக்கின்றன.

அதுமாத்திரமன்றி அமெரிக்காவின் ஆர்.எம். பார்க், சீனாவின் சினோபெக் போன்ற நிறுவனங்களும், எரிபொருள் விற்பனை நிலையங்களை கொண்டிருக்கின்றன.

பெரும்பாலான எரிபொருள் விற்பனை நிலையங்கள், இலங்கை பெட்ரோலிய கூட்டுத்தாபனத்திடமே உள்ளன.

இவ்வாறான நிலையில், இந்தியா, அமெரிக்கா, சீனா ஆகிய மூன்று நாடுகளும் இலங்கையின் எரிபொருள் சந்தையை தங்கள் கட்டுப்பாட்டுக்குள் கொண்டு வருவதற்கு களம் இறங்கியுள்ளன.

தேசிய மக்கள் சக்தி அரசாங்கம் ஆட்சிக்கு வந்த பின்னர் சீனாவில் இருந்து மிகப்பெரிய முதலீட்டை கொண்டு வந்ததாக தம்பட்டம் அடித்துக் கொள்கிறது.