என்.பி.பி.யின் சரிவும் மறைப்பும்

வாக்கு சரிவினால் ஏற்பட்டிருக்கின்ற பெரும் தோல்வியை மறைப்பதற்கு, தேசிய மக்கள் சக்தி 265 உள்ளூராட்சி சபைகளை கைப்பற்றியுள்ளது என்ற செய்தி உதவியிருக்கிறது.

- 

இன்னமும் ஒரு வருடத்தை நிறைவு செய்யாத, தேசிய மக்கள் சக்தி அரசாங்கம், தனது பலத்தை காண்பிக்கும் முயற்சியில் தோல்வியடைந்திருக்கிறது. ஜனாதிபதி தேர்தல், பாராளுமன்ற தேர்தல் ஆகியவற்றோடு ஒப்பிடுகின்ற போது, இந்த தேர்தலில் தேசிய மக்கள் சக்தி கணிசமான பின்னடைவை சந்தித்திருக்கிறது.

ஜனாதிபதி தேர்தலில் 56 இலட்சம் வாக்குகளுக்கு மேல் பெற்ற தேசிய மக்கள் சக்தி, பாராளுமன்றத் தேர்தலில் 68 இலட்சத்துக்கும் அதிகமான வாக்குகளை பெற்றிருந்தது.

அவற்றுடன் ஒப்பீடு செய்யும் போது, உள்ளூராட்சி தேர்தலில் அந்த கட்சிக்கு கிடைத்திருக்கும் 45 இலட்சம் வாக்குகள் மிகமிகக் குறைந்தளவு தான், என்பதில் எந்தச் சந்தேகமும் இல்லை.

உள்ளூராட்சித் தேர்தல் முடிவு, தேசிய மக்கள் சக்தியினால் திருப்தி அடையக் கூடிய ஒன்று அல்ல. அப்படித் திருப்தியடையுமேயானால், அந்தக் கட்சி தன்னை மீளாய்வு செய்து கொள்வதற்குத் தயாரில்லை என்று அர்த்தம்.

கடந்த பாராளுமன்றத் தேர்தலுடன் ஒப்பிடும் போது, தேசிய மக்கள் சக்தி 23 இலட்சத்து 60 ஆயிரம் வாக்குகளை இழந்திருக்கிறது. சதவீத அடிப்படையில் பார்க்கும்போது 18 சதவீதம் வரையான வாக்குகள் குறைந்திருக்கின்றன.

சில மாதங்களுக்குள் இந்த இழப்பை அந்த கட்சி சந்தித்திருப்பது ஆச்சரியமல்ல, அதற்கான காரணத்தை இந்த பத்தியில் பின்னர் பார்க்கலாம்.

இந்தத் தேர்தலில் தேசிய மக்கள் சக்தி, தனது முழு பலத்தையும் பயன்படுத்தியிருந்தது. வெற்றி பெறுவதற்காக, அது ஆட்சி அதிகாரத்தை பயன்படுத்தவும் தவறவில்லை.

அதேவேளை, தேர்தல் விதிகள் மீறப்படுவதையிட்டு, அதன் தலைவர்கள் கூட கவலை கொண்டிருக்கவில்லை.

ஜனாதிபதி அநுரகுமார திசாநாயக்கவின் தேர்தல் வெற்றிக்குப் பின்னர் தான் அநுர அலை பற்றிய ஒரு விம்பம் உருவானது. அந்த விம்பத்தை வைத்துக்கொண்டு, பாராளுமன்றத் தேர்தலில் தேசிய மக்கள் சக்தி மிகப்பெரிய வெற்றியை ஈட்டியிருந்தது.

உள்ளூராட்சி தேர்தல் அறிவிக்கப்படுவதற்கு முன்னரே, ஜனாதிபதி அநுரகுமார திசாநாயக்க மக்கள் சந்திப்பு என்ற பெயரில், மாவட்டம் தோறும் பிரசாரத்தை முன்னெடுக்க தொடங்கினார்.

அவர் தேர்தல் காலத்தில் அரச நிர்வாகத்தை கவனிப்பதை விட மக்கள் சந்திப்புகளில் பங்கேற்பதிலேயே அதிக நேரத்தை ஒதுக்கிக் கொண்டார்.