இலங்கை மத்திய வங்கியால் வெளியிடப்பட்ட ஐந்தாவது ஞாபகார்த்த நாணயத்தாள்

இலங்கை மத்திய வங்கியின் முக்கிய நோக்கங்களில் ஒன்று நாணயத்தின் உள்நாட்டுப் பெறுமதியை நிலையாகப் பேணுவதாகும். பொருளாதார மற்றும் விலை மட்டங்களின் உறுதியைப் பராமரிப்பதன் மூலம் பணவீக்கம் மற்றும் பணச்சுருக்க நிலைமைகளற்ற பொருளாதாரத்தைப் பராமரிப்பது இதன் குறிக்கோளாகும்.

- நிவேதா அரிச்சந்திரன்

அந்தவகையில் 75ஆவது ஆண்டு நிறைவைக் குறிக்கும் சுற்றோட்டத்திற்கு விடப்படும் 2000 ரூபா ஞாபகார்த்த நாணயத்தாளை இலங்கை மத்திய வங்கி வெளியிட்டுள்ளது.

தேசத்தின் முன்னேற்றத்திற்கான அத்திவாரமாக பொருளாதார உறுதிப்பாட்டைப் பேணுவதற்கான மத்திய வங்கியின் தளராத அர்ப்பணிப்பினை பிரதிபலித்து 'சுபீட்சத்திற்கான உறுதிப்பாடு' எனும் ஆண்டு நிறைவின் கருப்பொருளுக்கு ஒத்திசைவாக இந்நாணயம் அமைந்துள்ளது. இது இலங்கை மத்திய வங்கியால் வெளியிடப்படும் ஐந்தாவது ஞாபகார்த்த நாணயத்தாளாகும்.

இலங்கை மத்திய வங்கியின் ஆளுநர் முனைவர் பி.நந்தலால் வீரசிங்கவினால் ஜனாதிபதியும், நிதி, திட்டமிடல் மற்றும் பொருளாதார அபிவிருத்தி அமைச்சருமான அநுர குமார திசாநாயக்கவிடம் ஜனாதிபதி செயலகத்தில் வைத்து வெள்ளியன்று காலை ஞாபகார்த்த நாணயத்தாள் உத்தியோகபூர்வமாக கையளிக்கப்பட்டது.

நாணயத்தின் முன்பக்கம் இலங்கை மத்திய வங்கியின் தலைமை அலுவலகக் கட்டிடத்தையும், கொழும்பு வெளிச்சவீட்டு மணிக்கூட்டுக் கோபுரத்துடன் இணைத்து அண்மைய நகர அபிவிருத்தியைக் காண்பிக்கின்ற கொழும்பின் தொடுவானத்தையும், 75ஆவது ஆண்டுநிறைவு இலட்சினையையும் கொண்டுள்ளது. பாதுகாப்பை மேம்படுத்துவதற்கும் பொதுமக்கள் அத்தாட்சிப்படுத்தலை வசதிப்படுத்துவதற்கும் நிறம் மாறுகின்ற பாதுகாப்பு நூல் புகுத்தப்பட்டுள்ளது.

தொடுகையின் மூலம் நாணயத் தாளை இனங்கண்டுகொள்வதற்கு கட்புலக் குறைபாடு உடையவர்களுக்கு உதவுவதற்கான ஒவ்வொன்றும் வைர வடிவத்துடனான ஆறு உயர்த்தப்பட்ட கட்டங்கள் இடது மற்றும் வலது ஓரங்களின் இரு மருங்கிலும் அச்சிடப்பட்டுள்ளது.

நாணயத் தாள் அதன் பின்பக்கத்தில் பொருளாதாரத் தாக்குப்பிடிக்கும் தன்மை, முன்னேற்றம் என்பனவற்றுக்கான மத்திய வங்கியின் கடமைப்பொறுப்பினை அடையாளப்படுத்தி இலங்கையின் வண்ணமயமான வரைபடம், நீல அல்லி, மத்திய வங்கியின் நோக்கக்கூற்று என்பனவற்றை எடுத்துரைக்கின்றது.