பிரெடரிக் ஃபோசைத் ஒருவரில் நால்வர் ; விமானி, பத்திரிகையாளர், உளவாளி, எழுத்தாளர்

அவருக்கும் விடுதலை புலிகளுக்கும் இடையில் என்ன தொடர்பு?

- 

தமிழீழ விடுதலைப் புலிகளுக்கும் 2025 ஜூன் 9 ஆம் திகதி காலமான பிரபல ஆங்கில நாவலாசிரியர் ஃபிரெடரிக் ஃபோசைத் துக்கும் ஒரு தொடர்பு இருக்கிறதா? இந்த கேள்விக்கான எளிதான பதில் 'இல்லை' என் பதேயாகும். ஆனால், ஃபோசைத்தினால் எழுதப்பட்ட நாவல் ஒன்றில் விபரிக்கப்பட்ட உபாயம் ஒன்றை விடுதலைப் புலிகள் ஆட்களை கொலை செய்வதற்கு பிரதிப் பண்ணினார்கள் என்று கொஞ்ச காலம் ஊகங்கள் நிலவியது என்பதை நிச்சயம் சொல்லத்தான் வேண்டும்.

அதுவெல்லாம் இந்தியாவின் தமிழ்நாடு மாநிலத்தில் ஸ்ரீபெரும்புதூரில் 1991 மே 21 ஆம் திகதி முன்னாள் இந்தியப் பிரதமர் ராஜீவ் காந்தியை விடுதலைப் புலிகள் கொலை செய்வதுடன் தொடங்கியது. காங்கிரஸ் கட்சியின் தலைவரான ராஜீவ் காந்தி கட்சியின் வேட்பாளர் மரகதம் சந்திரசேகருக்கு ஆதரவாக நடைபெற்ற தேர்தல் பிரசாரக் கூட்டத்தில் உரையாற்றுவதற்காக ஸ்ரீபெரும்புதூருக்கு வருகை தந்தார்.

அப்போதுதான் 'தனு' என்ற பெயரால் அறியப்பட்ட இலங்கை தமிழ் யுவதி ராஜீவ் காந்திக்கு நெருக்கமாக சென்றார். செம்மஞ்சள் மற்றும் பச்சை நிறத்திலான சுரிதார் அணிந்திருந்த மூக்குக்கண்ணாடி போட்ட அவள் ராஜீவ் காந்தியின் பாதங்களை தொடுவதற்காக மரியாதையுடன் குனிந்தாள். தனது உடம்பைச் சுற்றிக் கட்டியிருந்த பட்டிக்குள் மறைத்து வைக்கப்பட்டிருந்த குண்டை அவள் வெடிக்க வைத்தாள். ராஜீவ் காந்தியும் கொலையாளி தனுவும் குறைந்தது வேறு 18 பேரும் அந்த குண்டுவெடிப்பில் கொல்லப்பட்டனர். 42 பேர் படுகாயமடைந்தனர்.

இந்தியாவை உலுக்கிய அந்தக் கொலை உலகம் பூராவும் அதிர்ச்சி அலைகளை ஏற்படுத்தியது. அதுவே வெடிபொருட்கள் நிரப்பப்பட்ட ஒரு 'தற்கொலைப்பட்டி' கொலை முயற்சி ஒன்றுக்கு பயன்படுத்தப்பட்ட முதல் சந்தர்ப்பமாகும். வெடிபொருட்கள் நிரப்பப்பட்ட வாகனங்கள் பயன்படுத்தப்பட்டிருக்கின்றன, ஆனால், தற்கொலைப்பட்டி பயன்படுத்தப்பட்ட முதல் சம்பவமாக இது பதிவாகியது. அடுத்து வந்த வருடங்களில் விடுதலைப் புலிகள் 'கரும்புலிகள்' என்று அறியப்பட்ட தற்கொலைக்குண்டு போராளிகளை பல தாக்குதல்களில் பயன்படுத்தினர். அது விடுதலைப் புலிகளின் முத்திரையாக மாறியது.

"த நெகோஷியேற்றர்"