200 அடி ஆழமான பள்ளத்தில் கணவனைத் தூக்கி வீசிய புது மனைவி

மேகாலயாவில் தேனிலவுக்குச் சென்ற போது கணவர் ராஜா ரகுவன்சியை, அவரது மனைவி சோனம் 200 அடி ஆழமான பள்ளத்தில் தூக்கி வீசியுள்ளார். மத்திய பிரதேசத்தின் இந்தூரைச் சேர்ந்த டிராவல்ஸ் நிறுவன அதிபர் ராஜா ரகுவன்சி (28). இவருக்கும் அதே பகுதியைச் சேர்ந்த சோனத்துக்கும் (25) கடந்த மே 11ஆம் திகதி திருமணம் நடைபெற்றது.

- 

இருவரும் தேனிலவைக் கொண்டாட மேகாலயா சென்றனர். கடந்த மே 23ஆம் திகதி ராஜாவையும் சோனத்தையும் காணவில்லை. கடந்த 2ஆம் திகதி மேகாலயாவின் சிரபுஞ்சியில் உள்ள வெய் சாவ்டாங் அருவி அருகே உள்ள பள்ளத்தாக்கில் ராஜா ரகுவன்சியின் உடல் மீட்கப்பட்டது.

மேகாலயா பொலிஸார் நடத்திய விசாரணையில் ராஜா ரகுவன்சி கொலை செய்யப்பட்டிருப்பது தெரிய வந்தது. இது தொடர்பாக அவரது மனைவி சோனம், காதலர் ராஜ் குஷ்வாகா (21) மற்றும் ஆகாஷ் (19), விஷால் (22), ஆனந்த் (23) ஆகியோர் கைது செய்யப்பட்டுள்ளனர்.

இந்தக் கொலை வழக்கு குறித்து மேகாலயா பொலிஸார் கூறியதாவது: "சோனத்தின் தந்தை தேவி சிங், இந்தூரில் பிளைவுட் கடை நடத்தி வருகிறார். அவர் பக்கவாதத்தால் பாதிக்கப்பட்டதால் மகன் விபின், மகள் சோனம் இருவரும் கடையைக் கவனித்து வந்தனர். இந்தக் கடையில் ராஜ் குஷ்வாகா கணக்காளராகப் பணியாற்றி வந்தார். அப்போது சோனத்துக்கும் ராஜ் குஷ்வாகாவுக்கும் இடையே காதல் மலர்ந்தது. இருவரும் கடந்த சில ஆண்டுகளாக இரகசியமாகக் காதலித்து வந்தனர்.

வேறு சாதி, ஏழை குடும்பத்தைச் சேர்ந்த ராஜ் குஷ்வாகாவை தனது குடும்பத்தினர் நிச்சயமாக ஏற்றுக்கொள்ளமாட்டார்கள் என்பது சோனத்துக்கு நன்றாகத் தெரியும். எனவே குடும்பத்தினர் ஏற்பாடு செய்த திருமணத்துக்கு அவர் சம்மதம் தெரிவித்தார்.

கடந்த மே 11ஆம் திகதி ராஜா ரகுவன்சி-சோனம் திருமணம் நடைபெற்றது. கணவரைக் கொலை செய்துவிட்டு காதலர் ராஜ் குஷ்வாகாவுடன் நேபாளத்துக்குத் தப்பிச் செல்ல சோனம் சதித் திட்டம் தீட்டினார். இதற்காக தேனிலவுக்குச் செல்ல அவர் வலியுறுத்தினார்.