மஹிந்தானந்தவுக்கு 20 வருடங்கள் நளினுக்கு 25 ஆண்டுகள் சிறை

14,000 கெரம், 11,000 டாம் பலகைகளை கொள்வனவு செய்து விளையாட்டு சங்கங்களுக்கு வழங்கிய குற்றச்சாட்டில் மேல் நீதிமன்றம் தீர்ப்பு

- எம்.எப்.எம்.பஸீர்

2015ஆம் ஆண்டு ஜனாதிபதித் தேர்தலின் போது இலங்கை விளையாட்டு சம்மேளனம் மூலம் 14,000 கரம் மற்றும் 11,000 டாம் பலகைகளை கொள்வனவு செய்து விளையாட்டு சங்கங்களுக்கு வழங்கிய குற்றச்சாட்டில், முன்னாள் விளையாட்டுத்துறை அமைச்சர் மஹிந்தானந்த அளுத்கமகே மற்றும் ச.தொ.ச.வின் முன்னாள் தலைவர் பின்னர் வர்த்தக அமைச்சராக கடமையாற்றிய நளின் பெர்னாண்டோ ஆகியோர் குற்றவாளிகள் என்று கொழும்பு மேல் நீதிமன்றம் நேற்று தீர்ப்பறிவித்தது.

மூன்று நீதிபதிகள் கொண்ட மேல் நீதிமன்ற அமர்வு ஏகமனதாக இந்த தீர்ப்பை அறிவித்தது.

அதன்படி, முன்னாள் வர்த்தக அமைச்சர் நளின் பெர்னாண்டோவுக்கு 25 ஆண்டுகள் கடூழிய சிறைத்தண்டனையும், முன்னாள் விளையாட்டுத்துறை அமைச்சர் மஹிந்தானந்த அளுத்கமகேவுக்கு 20 ஆண்டுகள் கடூழிய சிறைத்தண்டனையும் விதிக்கப்பட்டது. நளின் பெர்னாண்டோவுக்கு நான்கு இலட்சம் ரூபா அபராதமும், மஹிந்தானந்த அளுத்கமகேவுக்கு இரண்டு இலட்சம் ரூபா அபராதமும் செலுத்த உத்தரவிட்ட நீதிமன்றம், அதனை செலுத்தத் தவறினால் மேலதிகமாக சிறைத்தண்டனை விதிக்கப்படும் என்றும் அறிவித்தது.

ஆறு ஆண்டுகள் நீடித்த நீண்ட வழக்கு விசாரணைக்குப் பின்னர், நீதிபதி மஹேன் வீரமன் தலைமையிலான பிரதீப் அபேரத்ன மற்றும் அமலி ரணவீர ஆகிய மூவர் கொண்ட நீதிபதிகள் அமர்வு இந்த தீர்ப்பை வழங்கியது.

தீர்ப்பை அறிவித்த மூன்று பேர் கொண்ட உயர் நீதிமன்ற அமர்வின் தலைவரான நீதிபதி மஹேன் வீரமன், அரசியல் நோக்கங்களுக்காக இலங்கை விளையாட்டு கூட்டமைப்பு மூலம் 14,000 கரம் பலகைகள் மற்றும் 11,000 டாம் பலகைகளை இறக்குமதி செய்து விளையாட்டு சங்கங்களுக்கு விநியோகித்ததன் மூலம் அரசாங்கத்துக்கு 53 மில்லியன் ரூபாவுக்கு மேல் இழப்பு ஏற்படுத்தியதாக குற்றப்பத்திரிகை தாக்கல் செய்யப்பட்டதாக கூறினார்.

அதன்படி, பிரதிவாதிகள் மீதான குற்றச்சாட்டுகள் சந்தேகத்திற்கு இடமின்றி நிரூபிக்கப்பட்டுள்ளதாகவும், அதன்படி அவர்கள் குற்றவாளிகள் என்று தீர்மானிப்பதாகவும் மூன்று பேர் கொண்ட அமர்வின் தலைமை நீதிபதி மஹேன் வீரமன் அறிவித்தார்.

பின்னர் தலைமை நீதிபதி, தண்டனை வழங்குவதற்கு முன்பு பிரதிவாதிகள் சார்பாக எதும் சொல்வதற்கு இருப்பின் அவற்றை முன்வைக்குமாறு அறிவித்தார்.

இதன்போது, முதல் குற்றவாளி நளின் பெர்னாண்டோ சார்பில் ஆஜரான ஜனாதிபதி சட்டத்தரணி அனில் சில்வா விடயங்களை முன்வைத்தார்.