యతి నియమాలు

సూతుడు ఒకసారి సన్యాసులు విధులను వివరిస్తూ “విభూతి రేఖలు ధరించి పంచోపచారాలతో గురుపూజ చేసి ఓం శ్రీయే నమః అని నమస్కరించుకోవాలి" అని చెప్పాడు.

- - యామిజాల జగదీశ్

సూతుడు ఒకసారి సన్యాసులు విధులను వివరిస్తూ “విభూతి రేఖలు ధరించి పంచోపచారాలతో గురుపూజ చేసి ఓం శ్రీయే నమః అని నమస్కరించుకోవాలి" అని చెప్పాడు. తర్వాత గణపతికి, దుర్గాదేవికి క్షేత్రపాలకులకు దోసిలి ఒగ్గి ఓం అస్త్రాయ ఫట్ అనుకోవాలి. విఘ్నాలు దూరం కావడం కోసం మూడు సార్లు కరతాళ ధ్వనులు చేయాలి. విఘ్నాలు పోయినట్లు భావించి ఆకాశం వైపు చూసి కూర్చుని ప్రాణాయామం చేయాలి.

హృదయగత జీవాత్మను సహస్రావంలోని పరమాత్మతో వికీభవింపజేసి సహస్రాలకమలంలోని అమృత ప్రవాహంతో తడపబడినవాడై సోహం అనుకోవాలి. అలా అనుకుంటూ సహస్రారగతమయిన జీవాత్మను విడదీసి హృదయ కమలంలోకి దింపి పంచ ప్రాణాలను నెలకొల్పి శంకరుడిని స్మరిస్తూ మనసులో రేగే వాంఛలను పరిహరించాలన్నారు.

ప్రణవానికి ఋషి బ్రహ్మ ఛందస్సు గాయత్రి పరమాత్మ అయిన సదాశివుడు ఆకారం బీజం ఉకారం శక్తి మకారం కీలకం మోక్షార్థం వినియోగం, ఓం నమః అని కరాంగ విన్యాసాలు చేసుకోవాలి. 'అ' కారం బ్రహ్మ స్వరూపంగాను, 'ఉ' కారం విష్ణుస్వరూపంగాను, 'మ' కారం రుద్రస్వరూపంగాను భావించుకోవాలి.

అలాగే సూతుడు ప్రత్యేక శివపూజా విధి గురించి తెలియజేశాడు. యతులు శివపూజ చేసేటపుడు ముందుగా గణపతిని రక్తాభుడుగా, మహాకాయుడుగా, సర్వాభరణభూషితుడుగా, పాశాంకుశ వరదాభయ ముద్రలు దాల్చినవాడుగా, గజవదనుడిగా, సర్వవిఘ్న నాశకుడుగా ధ్యానించాలన్నారు. గంధం, పుష్పం, అక్షతలు, అరటిపళ్లు, కొబ్బరి మొదలైన వాటిని అర్పించుకోవాలి.