అష్టాంగ యోగాతో ఆరోగ్యం

ఇప్పుడు యోగ ప్రపంచ దృష్టిని ఆకర్షిస్తోంది. అయితే యోగా అంటే ఆసనాలు సాధన చేయడమే అన్న భావన ఎక్కువ మందిలో ఉంది.

- - డాక్టర్ ఎన్.బి. సుధాకర్ రెడ్డి

ఇప్పుడు యోగ ప్రపంచ దృష్టిని ఆకర్షిస్తోంది. అయితే యోగా అంటే ఆసనాలు సాధన చేయడమే అన్న భావన ఎక్కువ మందిలో ఉంది. నిజానికి యోగా ఒక జీవన శైలి. యోగ పితామహుడు పతంజలి యోగాను ఎనిమిది అంశాలుగా వర్గీకరించారు. దానినే అష్టాంగ యోగా అంటారు. 1) యమ: విలువలు పాటించడం విలువలు పాటించడం 2) నియమ స్వీయ క్రమ శిక్షణ 3) ఆసన : శారీరక వ్యాయామాలు 4) ప్రాణాయామ : శ్వాస నియంత్రణ; 5)ప్రత్యాహార : ఇంద్రియ నిగ్రహం; 6) ధారణ : ఏకాగ్రత; 7) ధ్యాన: మానసిక ప్రశాంతత; 8) సమాధి : సమతుల్య స్థితి. ఈ ఎనిమి అంశాలను జీవన శైలిగా మార్చుకుంటే జీవితం ఒక యోగం అవుతుంది. ఆరోగ్యం, ఆనందం, ఆయువు వృద్ధి చెందుతుంది.

ప్రపంచ ఆరోగ్య సంస్థ నిర్వచనం ప్రకారం శారీరక, మానసిక, సామాజిక సమతుల్య స్థితిని ఆరోగ్యం అంటారు. కేవలం ఎలాంటి వ్యాధులు, జబ్బులు లేకపోవడం మాత్రమే ఆరోగ్యం కాదు. శారీరక సామర్థ్యం, మానసిక దృఢత్వం, మెరుగైన సామాజిక సంబంధాలు కలిగివున్న వారినే పరిపూర్ణ ఆరోగనయవంతులుగా చెప్పవచ్చు. ఇది జీవనశైలి, వ్యక్తిత్వం, ప్రవర్తన, ఆహారం, వ్యాయామం, నిద్ర, ఒత్తిళ్ల నియంత్రణ లాంటి పలు అంశాలపై ఆధారపడి ఉంటుంది.

ఐదు వేల సంవత్సరాల క్రితం పతంజలి యోగి సంపూర్ణ ఆరోగ్యం కోసం యోగ సూత్రాలను అందించారు. ప్రకృతి, జంతువులు, పక్షులు, ఇతర ప్రాణులను పరిశీలించి పలు అంశాలను సూత్రీకరించారు. మనిషిలోని గ్రంథులు, నాడీ వ్యవస్థ, కండరాలు, ఆలోచనలను క్రమబద్ధీకరించడానికి తగిన పద్ధతులను వెలుగులోకి తెచ్చారు.