తెలుగుకు దూరం అవుతున్న బాల్యం

తెలుగుకు దూరం అవుతున్న బాల్యం

- జయసూర్య

మహాకవి గురజాడ అప్పారావు, రచన కన్యాశుల్కం నాటకంలో వెంకమ్మ, గిరీశాన్ని పిలిచి, 'బాబూ మా పిల్లాడూ మీరూ ఇంగ్లీషులో ఒక్కసారి మాట్లాడు కుందురూ' అని బతిమాలు తుంది. గురువు వచ్చీరాని ఆంగ్లంలో, వెంకటేశంతో మాట్లాడేస్తాడు. అది విని వెంకమ్మ ఎంతో ఆనందపడుతుంది. గురజాడ ఆ ముచ్చట సృష్టించి నాటి మధ్య తరగతి కుటుంబాలలో వున్న పరభాషా వ్యామోహాన్ని వెంకమ్మ పాత్ర ద్వారా ప్రదర్శింపచేసారు. శతాబ్దాల కాలం నాటి తెలుగు సమాజంలో, ఆంగ్లం పట్ల ఉన్న మోజు, వ్యామోహం కుటుంబం కొంప ఎలా ముంచిందీ, కన్యాశుల్కంలో అద్భుతంగా నాటక ఫక్కీలో సంభాషణలు వ్యక్తం చేస్తాయి. ఆనాటి వెంకమ్మ ముచ్చట తెలుగుజాతి కొంప కొల్లేరు చేసింది. 2012లో మహాకవి గురజాడ స్వర్ణోత్సవ శతాబ్ది ఉత్సవాలు వైభవంగా నిర్వర్తించుకొన్నాం. “డామిట్ కథ అడ్డం తిరిగింది' ప్రస్తుతం డిజిటల్ యుగంలో ప్రవేశించాం 'ఒక్కసారి చక్కటి తెలుగులో మాట్లాడండిరా' అని మాతృభాష ప్రేమికులు పిల్లల్ని బతిమాలుకొనే దుస్థితి సంప్రాప్తించింది. ప్రముఖ తమిళకవి సుబ్రహ్మణ్య భారతి' 'వెన్నెల' వేళ పడవ ప్రయాణం చేస్తూ, 'సుందర తెలుంగు 'గీతం' పాడుకుంటూ పరవశిద్దాం- అనే రోజుల నుంచి 'నా అక్షరాలు వెన్నెల్లో ఆడుకొనే అందమైన ఆడపిల్లలు' అని బాలగంగాధర తిలక్ చెప్పిన దశాబ్దాల నుంచి మన ప్రయాణం ఎటుపోతోంది? 'ఒక్క సంగీత మేదో పాడునట్లు, మాట్లాడేటప్పుడు విన్పించే భాష' అన్నారు. కవిసమ్రాట్ విశ్వనాథ. 'ఎంత చక్కని దోయి ఈ తెనుగు