పుడమికి తాపం..జగతికి శాపం!

గ్లోబల్ వార్మింగ్ లేదా భూతాపం పెరగడం అంటే వాతావరణ మార్పు అనేది ఉష్ణోగ్రతలు, వాతావరణ నమూనాలలో దీర్ఘకాలిక మార్పులను సూచిస్తుంది.

- ఆనంద 'మైత్రేయ'మ్

గ్లోబల్ వార్మింగ్ లేదా భూతాపం పెరగడం అంటే వాతావరణ మార్పు అనేది ఉష్ణోగ్రతలు, వాతావరణ నమూనాలలో దీర్ఘకాలిక మార్పులను సూచిస్తుంది. ప్రధానంగా శిలాజ ఇంధనాలను (బొగ్గు, చమురు, వాయువు వంటివి) కాల్చడం వ్యవసాయం వల్ల భూమి మీద వేడిని పట్టి ఉంచే వాయువులను ఉత్పత్తిని పెంచుతోంది. మానవ జనాభా పెరుగుతున్న కొద్దీ, శిలాజ ఇంధనాల పరిమాణం కూడా పెరుగుతోంది. మానవ కార్యకలాపాల వల్ల వాతావరణంలోకి విడుదలవుతున్న కార్బన్ డై ఆక్సైడ్, మీథేన్, నైట్రస్ ఆక్సైడ్ లాంటి హరిత గృహ వాయువులు భూవికిరణాన్ని అడ్డుకుని తిరిగి భూమి వేడిక్కడానికి కారణమవుతున్నాయి. ఈ విధంగా భూవికిరణం వల్ల భూమి చల్లబడటానికి బదులు తిరిగి భూవాతావరణం వేడెక్కడాన్ని గ్లోబల్ వార్మింగ్, భూతాపంగా పిలుస్తారు.

గ్లోబల్ వార్మింగ్ వలన మార్పులకు ముఖ్య కారణం: ఉత్తర దక్షిణ ధృవాలలో మంచు విపరీతంగా కరిగిపోవడం. ఇది చాలా ఆందోళన కలిగించే విషయం. గడచిన వేలాది సంవత్సరాలుగా కరగని మంచు, గత 200 సంవత్సరాలలో తీవ్రంగా కరిగిపోతోంది. దీనికి ముఖ్య కారణం.. పారిశ్రామిక విప్లవం వలన మారిన జీవన విధానాలు. దురదృష్టవశాత్తు మనం ఆ విప్లవంలోని చెడుని మాత్రం బాగా గ్రహించి జీర్ణించుకోవడం. దీనికి ఉదాహరణగా చూస్తే ఎక్కువగా వాహనాలు వాడటం, పరిశ్రమలు, పట్టణీకరణ మొదలైనవి. వీటి వల్ల కలిగే కార్బన్ ఉత్పాదకాలు (ఏమిషన్స్). ఇవి ఇప్పుడు తారాస్థాయికి చేరుకున్నాయి. వీటిని వెంటనే తగ్గించి తగు చర్యలు తీసుకోవాలి. ఈ కార్బన్ ఉత్పాదకాలు అధికంగా మారడం వల్ల భూమి మీద ఉన్న ఓజోన్ పొరకు చిల్లు పెట్టి భూమికి వచ్చిన సూర్యరశ్మి ఇక్కడే భూమి మీదే వుండేలా చేసి భూమి సగటు ఉష్ణోగ్రత పెరిగేలా చేసి దృవాల్లో వున్న మంచు కరిగే లాగా చేస్తున్నాయి. దీనివల్ల పరోక్షంగా చాలా కష్టాలు పడుతున్నాం. కనుక వెంటనే స్పందించవలసిన అవసరం ఎంతైనా ఉంది.

సాధారణంగా భూగోళం సగటు ఉష్ణోగ్రత 15.4 సి ఉంటుంది. ఈ ఉష్ణోగ్రత పెరగడాన్ని గ్లోబల్ వార్మింగ్ (భూగోళం వేడెక్కడం లేదా భూతాపం)గా పిలుస్తారు. సూర్యుడి నుంచి నిరంతరం బయటకు వెలువడే సౌరశక్తిని సౌర వికీరణం అంటారు. ఇందులో చాలా తక్కువ పరిమాణంలో శక్తి భూమిని చేరుతుంది. ప్రపంచవ్యాప్తంగా గ్లోబల్ వార్మింగ్ ప్రభావాన్ని మానవులు అనుభవి స్తున్నారు.