'తురంగ వృత్త' మే ముత్యాల సరం!

సాహిత్యం

- జయ సూర్య

1810 సంవత్సర ప్రాంతంలో, గురజాడ కంటే 100 సంవత్స రాలకు పూర్వమే, ముత్యాలసరం మాత్రాఛందస్సు సృజింపబడిందని డా॥ ఆచార్య ఫణీంద్ర 2008 ఉస్మానియా నుండి పి.హెచ్.డి. పట్టం పొందిన తన సిద్ధాంత గ్రంథంలో పేర్కొన్నారు.

19వ శతాబ్ది ఆరంభంలో 'రేవణూరి వేంకటా ర్యుడనే కవివతంసుడు తన కావ్యం 'శ్రీపాదరేణు ప్రభావం'లో ముత్యాలసరాన్ని తొలిగా ప్రయోగించారని డా॥ ఆచార్య ఫణీంద్ర అత్యంత ఆసక్తికరమైన పరిశోధనా ఫలితాంశాన్ని వెలుగులోకి తెచ్చారు. పదకవితా పితామహుడైన తాళ్ళపాక అన్నమాచార్యుని పుత్రీవంశీయులైన రేవూరి వేంకటార్యుడు తన కావ్యంలో ప్రయోగించిన ఛందస్సు పేరు తురంగ వృత్తం. డా॥ ఆచార్య ఫణీంద్ర, తెలుగు సాహిత్య చరిత్రలో 19వ శతాబ్ది, సాహిత్యం పట్ల క్షీణయుగమని, అంధయుగమని నెలకొని వున్న అపప్రథ పోగొట్టే సాహితీ పరిశోధనా కృషిలో భాగంగా, తెలుగు సాహిత్య జలధి లోతులలో శోధించి, పరిశోధించి అపూర్వ అంశాలను వెలికితీయడం అభినందనీయం. ఒక యుగానికి న్యూనతా భావంతో, లోతుపాతులను స్పృశించే సమగ్ర సాహిత్యాధ్యయనం పరిశోధనాన్వేషణ యింతవరకు నిర్వర్తించకపోవడమే కాకుండా, అంధకార యుగంగా ముద్రవేయడం తీవ్ర చారిత్రక తప్పిదం అనడంలో సందేహం లేదు.

19వ శతాబ్ది తెలుగు సాహిత్య చరిత్ర ఉషోదయ యుగంలో ఆ శతాబ్ది ఆరంభంలోనే ఛందోపరమైన నవ్యత సాధించిన మహాకవి రేవణూరి వేంకటార్యుని వృత్తంలో తురంగవల్గనం నడక కలిగి ఉందని ఈ ఛందస్సును తురంగవృత్తం అనడం ఔచిత్యమంతంగా ఎంతైనా సముచితమని డా॥ ఫణీంద్ర స్పష్టీకరించారు.