'ఫైన్ యాపిల్'!

మంచి భోజనం, స్వచ్ఛమైన తాగునీరు, పండ్లు... ఇలా సక్రమంగా అన్నీ తీసుకుంటుంటే ఎప్పటికీ ఆరోగ్యంగా వుండవచ్చు. ప్రకృతిలో పైనాపిల్ మాత్రమే కనిపించే బ్రోమెలైన్, ఆహార పదార్థాలు మరియు అనేక ముఖ్యమైన సమస్యల నిరోధానికి ఉపయోగిస్తారు.

- తరిగొప్పుల విఎల్లెన్ మూర్తి

మంచి భోజనం, స్వచ్ఛమైన తాగునీరు, పండ్లు... ఇలా సక్రమంగా అన్నీ తీసుకుంటుంటే ఎప్పటికీ ఆరోగ్యంగా వుండవచ్చు. ప్రకృతిలో పైనాపిల్ మాత్రమే కనిపించే బ్రోమెలైన్, ఆహార పదార్థాలు మరియు అనేక ముఖ్యమైన సమస్యల నిరోధానికి ఉపయోగిస్తారు. పుల్లగా....తియ్యగా ఉండే అనాస పండును తీసుకుంటే ఆరోగ్య ప్రయోజనాలెన్నో. ఒత్తిడి, ఆందోళనకు ఎక్కువగా గురవుతున్నవారు పైనాపిల్ తీసుకుంటే మంచిది.

ఇందులోని సోడియం, పొటాషియం టెన్షన్సు ను తగ్గిస్తాయి.చిన్నపిల్లలకు తగినంత పాలు లభించనట్లయితే అలాంటి వారికి అనాసపండు రసమిస్తే మంచిదంటున్నారు వైద్యులు.ప్రత్యేకమైన రంగు పైనాపిల్కు ప్రధాన ఆకర్షణ. పై పొర ముళ్ళులా ఉండడం, వైవిధ్యమైన ఆకారం ఇవన్నీ పైనాపిలు ప్రత్యేకంగా ఉంచుతున్నాయి. పైనాపిల్ రుచి తియ్యగా ఉంటుంది. పైనాపిల్తో జ్యూస్ను తయారు చేస్తారు. సలాడ్స్, సైడ్ డిషెస్కు కూడా పైనాపిల్ను ఉపయోగిస్తారు. పైనాపిల్లో ఎన్నో పోషకాలు ఉన్నాయి. కొన్ని రకాల ఆరోగ్య సమస్యలకు పైనాపిలు ఔషధంగా కూడా ఉపయోగిస్తారు.

పైనాపిల్ ఎక్కువ రోజులు నిల్వ ఉండదు. త్వరగా కుళ్లిపోతుంది. కాబట్టి కొన్న వెంటనే తినడం మంచిది.చాలామంది పైనాపిల్ను ఫ్రిజ్లో పెడుతుంటారు. కానీ అరటిపండ్లలోనే దీనికి ఫ్రిజ్ పడదు. బయట ఉంచడమే మంచిది. తొక్కుతీసిన పైనాపిల్ను వెంటనే గాలి చొరబడని డబ్బా లేదా ప్లాస్లిక్ కవర్లో ఉంచి ఫ్రిజ్లో పెడితే నాలుగైదురోజుల పాటు నిల్వ ఉంటుంది. జ్యూస్ని ఫ్రిజ్లో పెడితే రుచి మారుతుంది. దానికన్నా ముక్కలుగా నిల్వ చేయడమే మంచిది. కేనింగ్ లేదా ప్రాసెస్ చేసినవయితే ఏడాది వరకూ నిల్వ ఉంటాయి.

గులాబీరంగు పైనాపిల్

పైనాపిల్ పైన ముదురు గోధుమరంగు పొలుసులతో..లోపల పసుపు రంగుల్లో ఉంటుంది. అయితే ఈ పండును గులాబి రంగులోకి మార్చడానికి అనేక ప్రయత్నాలు జరిగాయి. ముఖ్యంగా 'డెల్ మౌంటే' అనే ప్రముఖ ఆహార ఉత్పత్తి సంస్థకు గులాబి రంగు పైనాపిల్ను సృష్టించాలనేది ఓ కల. అందుకే 2005 నుంచి ఆ సంస్థ గులాబి రంగు పైనాపిల్ను ఉత్పత్తి చేసే పనిలో పడింది. అయితే తాజాగా ఆ కల సాకారమై గులాబి రంగు పైనాపిల్ను పండించింది.