ஐடி ஊழியர்கள் அடிமைகள் அல்ல

ஓலா நிறுவனத்தில் இயந்திர கற்றல் (மிஷன் லேனிங்) பொறியாளரான நிகில் சோமவன்ஷி இந்த மாத தொடக்கத்தில் பெங்களூருவில் தற்கொலை செய்து கொண்டார். வேலை மன அழுத்தம் காரணமாக தற்கொலை செய்து கொள்வதாக ரெடிட்டிற் தளத்தில் ஒரு குறிப்பை முன்னதாகப் பகிர்ந்து கொண்டார்.

- 

புனேவில் உள்ள எர்ன்ஸ்ட் & யங் என்ற பன்னாட்டு நிறுவனத்தில் பட்டயக் கணக்காளராகப் பணிபுரிந்த கேரளப் பெண் அன்னா செபாஸ்டியன், கடந்த செப்டம்பரில் அதிக பணிச்சுமை காரணமாக மயங்கி விழுந்து இறந்தார். இந்த வகையில், ஐடி துறையில் ஊழியர்களின் தற்கொலைகள் மற்றும் இறப்புகளுக்கு பணியிடத்தில் அதிகப்படியான பணிச்சுமை மற்றும் சுரண்டல் முக்கியக் காரணம் ஆகும்.

நவீன காலத்தில் வேலைவாய்ப்புத் துறையில் தீவிரமாக இருக்கும் மிக முக்கியமான பிரச்சனைகளில் ஒன்று வேலை-வாழ்க்கைச் சமநிலை. நமது நாட்டில் நவீன தாராளமயப் பொருளாதாரக் கொள்கைகள் செயல்படுத்தப்பட்டதன் மூலம், பணி கலாச்சாரத்தில் ஒரு அடிப்படை மாற்றம் ஏற்பட்டுள்ளது. நிரந்தர வேலைகள் குறைந்து, ஒப்பந்தமயமாக்கல் மற்றும் வெளிமுகமை (அவுட்சோர்சிங்) அதிகரித்துள்ளன. பொதுத்துறை நிறுவனங்கள் தனியார்மயமாக்கப்பட்டுள்ளன அல்லது பெருமளவில் மூடப்பட்டுள்ளன.

மோடி ஆட்சியில் வேலையின்மை மற்றும் ஒப்பந்தமயமாக்கல் பெருமளவில் அதிகரித்துள்ளது. தொழிலாளர் சட்டங்களை நீக்குவதன் மூலம் அரசாங்கமே சுரண்டலுக்கு வழி வகுத்துள்ளது. வாழ்வதற்காக வேலை தேடும் இளைஞர்களுக்கு ஆரோக்கியமான வாழ்க்கை சாத்தியமற்றதாகியுள்ளது. நமது இளைஞர்கள் 'மகிழ்ச்சியை' இழந்து, பல்வேறு அழுத்தங்களுக்கு மத்தியில் துன்பகரமான வாழ்க்கையை வாழ்ந்து வரும் இயந்திர மனிதர்களாக மாறிவிட்டனர்.

அதிர்ச்சியூட்டும் புள்ளிவிவரங்கள்

ஆசிய மனநல சுகாதாரத்தின் 2023 அறிக்கையின்படி, நாட்டின் பூர்வீகத் தொழிலாளர்களில் 77 சதவிகிதம் பேர் மிதமான அல்லது கடுமையான மனநலப் பிரச்சனைகளை எதிர்கொள்கின்றனர். 39 சதவிகிதம் பேர் அதிக ஆபத்தான மனநலப் பிரச்சனையை எதிர்கொள்கின்றனர். சர்வதேச தொழிலாளர் அமைப்பின் (ஐஎல்ஓ) ஆய்வு, உலகிலேயே அதிக வேலை நேரங்களைக் கொண்ட நாடுகளில் இந்தியாவும் ஒன்று என்பதைக் காட்டுகிறது. சராசரி இந்தியத் தொழிலாளி வாரத்திற்கு 46.7 மணிநேரம் வேலை செய்கிறார் என்பதையும் இது குறிக்கிறது. அதே ஆய்வு, 51 சதவிகித இந்தியத் தொழிலாளர்களும் வாரத்திற்கு 49 மணிநேரத்திற்கும் அதிகமாக வேலை செய்ய வேண்டிய கட்டாயத்தில் உள்ளனர் என்பதையும் காட்டுகிறது.