பதின்ம வயதினரின் வளர்ப்புப் பெற்றோருக்கு கூடுதல் நிதியுதவி

பதின்மூன்று வயது, அதற்கு மேற்பட்ட பதின்மவயது இளையர்களைப் பராமரிக்கும் வளர்ப்புப் பெற்றோருக்கான மாதாந்திர படித்தொகையை சமுதாய, குடும்ப மேம்பாட்டு அமைச்சு அதிகரிக்கவுள்ளது.

- கீர்த்திகா ரவீந்திரன்

சிறப்பு அல்லது மருத்துவத் தேவையுடைய இளையர்களைப் பராமரிக்கும் வளர்ப்புப் பெற்றோருக்கு மாதாந்திர படித்தொகையும் அதிகரிக்கும்.

தற்போது, வளர்ப்புப் பெற்றோருக்கு மாதந்தோறும் $1,100 வழங்கப்படுகிறது. இத்தொகை $1,300க்கு அதிகரிக்கும்.

சிறப்பு அல்லது மருத்துவ தேவையுடைய இளையர்களைப் பராமரிப்போருக்கான படித்தொகை $1,800 ஆக அதிகரிக்கும். தற்போது அவர்கள் $1,500 பெறுகின்றனர். இந்த மாற்றங்கள் வரும் அக்டோபரில் நடப்புக்கு வரும் என்று சமுதாய, குடும்ப மேம்பாட்டு துணை அமைச்சர் கோ பெய் மிங் தெரிவித்தார்.

சன்டெக் சிங்கப்பூர் மாநாட்டு, கண்காட்சி நிலையத்தில் நேற்று நடைபெற்ற சமுதாய, குடும்ப மேம்பாட்டு அமைச்சின் வளர்ப்புப் பராமரிப்பு நிகழ்ச்சியில் பங்கேற்று அவர் ஆற்றிய உரையில் இந்த மாற்றங்களை அறிவித்தார்.

"பதின்மவயதினரைப் பராமரிக்கும் வளர்ப்புக் குடும்பங்களின் எண்ணிக்கையை அமைச்சு அதிகரிக்க விரும்புகிறது," என்றார் திரு கோ.

கடந்த ஆண்டு கிட்டத்தட்ட 630 வளர்ப்புக் குடும்பங்கள் இருந்தன. இந்த எண்ணிக்கை, பத்தாண்டுகளுக்கு முன்பு இருந்ததைவிட இருமடங்கு அதிகம் என்பதை அவர் சுட்டினார்.