காட்டிக் கொடுக்கப்பட்ட கடலும் கைவிடப்பட்ட குழந்தைகளும்

மனிதர்கள் உப்பின் துளிகள், அதனால்தான் நாங்கள் உப்பை, வியர்வையாக வியர்க்கின்றோம், உப்பை கண்ணீராக உருக்குகிறோம். எனவே, “உப்பிட்டவரை உள்ளளவும் நினை” என்றார்கள். ஆனால், நாம் உப்பிட்ட கடலால் மறந்து துரோகிகள் ஆனோம்.

- எஸ்.நயனகணேசன்

“கடல் சார்ந்து வாழ்கின்ற இச்சமூகம், இலங்கையினுடைய அரச கொள்கை வகுப்பாளர்களின் சீனாவுடனான ஒப்பந்தத்தினாலும், இந்தியக் கடல் அரசியலினாலும், இலங்கை அரசாங்கத்தோடு நின்று செயற்படுகின்ற தமிழ்த் தலைவர்கள், அமைச்சர்களுடைய செயற்பாடுகளினாலும், அவர்களைச் சார்ந்து நிற்கின்ற அரச அதிகாரிகள், கல்விமான்கள், தமிழ் ஊடகங்களின் செயற்பாடுகளினாலும் தங்களுக்கு எஞ்சியிருந்த கடல் வளத்தையும் இழக்கப்போகின்றோமே என்று ஏங்கித் தவிக்கும் பரிதாப நிலைக்குத் தள்ளப்பட்டுள்ளனர்." (பக்கம்: 23)

நீலப்பொருளாதாரம், கடல் விவசாயம் மற்றும் கடல் பொருளாதார அபிவிருத்தி என உலக நாடுகள் தம் கடல் வளத்தைப் பயன் படுத்துகையில் ஈழக்கடலின் புதல்வர்கள் குறிப்பாக வடபுலத்து மீனவ சமூகத்தின் பிரச்சினைகள் தசாப்தகாலமாக இந்து சமுத்திரத்தின் உப்பை விட பரந்து விரிந்து தீர்வின்றி ஆர்ப்பரித்துக்கொண்டிருக்கின்றது.

"எம் துயரங்களை எவரும் கண்டு கொள்வதாயில்லை" என வருந்துகின்றனர் கடலின் பழங்குடியினர்.

சமூக ஆய்வாளர் மரியநாயகம் நியூட்டன் என்பவரால் எழுதப்பட்டுள்ள "காட்டிக்கொடுக்கப்பட்ட கடலும் கைவிடப்பட்ட மக்களும்" என்ற ஆய்வு நூல் அண்மையில் யாழ் நகரில் வெளியிடப்பட்டது.

இந்திய மீனவர்களின் அத்துமீறல், சட்ட விரோத மீன்பிடி, இலங்கை இந்திய மீனவர்களுக்கிடையிலான கைகலப்புக்கள், கைது நடவடிக்கைகள் மற்றும் கடலட்டை பன்னைபோன்றபல இன்னோரன்ன பிரச்சனைகள் இலங்கையின் சர்வதேச விவகார அரசியலில் மிக முக்கிய பேசு பொருள்.