Trane wag in twee halfeindrondes

As die son Saterdagmiddag net ná vyfuur sak, sal daar twee kleedkamers wees waar harte swaar is, en twee waar trane van vreugde vloei.

- 

Hugo Redelinghuys

Die rugbykruitvat is gepak, die lont is aan die brand - en nou wag die groot ontploffing Saterdagmiddag, 20 September, wanneer die twee halfeindrondes in die SWD-rugbyunie Superliga se Top 8-kompetisie beslis word.

Pacaltsdorp en Heidelberg gaan beslis uit hul nate bars wanneer dié vier swaargewigte en pasaangeërs van die Superliga mekaar takel.

Dis die oomblik van waarheid vir Evergreens, Bridgton, Heidelberg en Progress.

Die wenners pak mekaar 'n week later in die eindstryd op Outeniquapark, terwyl die verloorders se seisoen in stilte en trane eindig.