કાઠિયાવાડી ભોજનના શોખીનોને હવે મિજબાની મોંઘી પડશેઃ શાકભાજીના ભાવમાં ફરીથી ભડકો

લગ્નસરાની સિઝનના પગલે શાકભાજીની માગમાં વધારોઃ ઓળાતાં રીંગણાં, ટામેટાં, કોથમીરના ભાવ આસમાને પહોંચ્યા

- 

અમદાવાદ સહિત રાજ્યભરનાં બજારોમાં રીંગણના ભાવ અચાનક બમણા થઈ ગયા છે. અનિયમિત વરસાદ અને પાકને થયેલા નુકસાનના કારણે આ શિયાળામાં રીંગણની આવક ઘટી ગઈ છે, જેથી ગ્રાહકોને ૪૦-૫૦ રૂપિયાની જગ્યાએ સીધા ૧૨૦ રૂપિયા કિલોએ વધુ ભાવ ચૂકવવા પડી રહ્યા છે. ખાસ કરીને શિયાળાની શરૂઆત થતાંની સાથે જ સ્વાદરસિકો ઓળો-રોટલો, લીલાં લસણ-ડુંગળીનું શાક સહિતનાં સ્વાદિષ્ટ ભોજનની મોજ માણવા અધીરા બનતા હોય છે. આ વર્ષે શિયાળાની શરૂઆતમાં જ થયેલા ભારે કમોસમી વરસાદથી શાકભાજી સહિતનો પાક નિષ્ફળ ગયો છે. આ ઉપરાંત હાલમાં લગ્નસરાની સિઝનના પગલે શાકભાજી ની માગમાં પણ વધારો થતાં ઓળાનાં રીંગણાં, ટામેટાં, કોથમીર સહિતનાં શાકભાજીના ભાવ આસમાને પહોંચ્યા છે.