રેકોર્ડબ્રેક ગરમીઃ આજે ચાર જિલ્લામાં હીટવેવનો ખતરો, અમદાવાદીઓ દઝાડતી લૂમાં શેકાઈ ગયા

આગામી સપ્તાહથી અમદાવાદમાં અગનગોળા વરસશેઃ લઘુતમ તાપમાન વધતાં સવારે અને સાંજે પણ અસહ્ય બફારાનો અનુભવ થશે

- 

હીટવેવના કહેરના કારણે અમદાવાદ સહિત રાજ્યભરના લોકો ત્રાહિમામ્ પોકારી ઊઠ્યા છે. હવામાન વિભાગે આજે કચ્છ, સાબરકાંઠા, બનાસકાંઠા અને રાજકોટમાં કાળઝાળ ગરમીનું યલો એલર્ટ જારી કર્યું છે. આ ચાર જિલ્લામાં આજે હીટવેવ ફરી વળશે. છેલ્લા ૨૪ કલાક દરમિયાન અમદાવાદમાં સિઝનની સૌથી વધુ ૪૩.૨ ડિગ્રી ગરમી નોંધાતાં અમદાવાદીઓ હેરાન-પરેશાન થઈ ગયા છે. સામાન્ય કરતાં ૪.૨ ડિગ્રી ઊંચું તાપમાન અને બપોરના સમયે અંગ દઝાડતી લૂ ફૂંકાતાં શહેરીજનો રીતસર શેકાઈ ગયા હતા.

અમદાવાદના લોકોની પરેશાની હજુ વધવાની છે. હવામાન વિભાગે તેની લેટેસ્ટ આગાહીમાં જણાવ્યું છે કે આગામી સપ્તાહ એટલે કે ૧૪ એપ્રિલથી અમદાવાદના આકાશમાંથી અગનગોળા વરસતા હોય તેવી ગરમીનો અનુભવ થશે. આ સમયગાળામાં લઘુતમ તાપમાન પણ વધી જશે અને તેના કારણે સવારે-સાંજે પણ અસહ્ય બફારાનો અનુભવ થશે.