Not an easy bridge to cross

In Rustenburg is daar die afgelope week-en-'n-half reeds 'n effense, onverwagte kalmte voor die langverwagte storm - om dit nou só uit te druk. Vir die afgelope week al byt twee verskillende gemeenskappe in Rustenburg handewroegend op die tande in afwagting op twee baie belangrike en onvermydelike gebeure wat vir die volgende nagenoeg 10 tot 12 maande 'n reuse invloed op Rustenburg se dikwels chaotiese verkeerstoestande sal hê.

- 

Eerstens die goeie nuus op p3 van hierdie uitgawe kom Rustenburg Herald met die hele sak patats vorendag oor die langverwagte heropening van die Krugerstraat-brug wat sedert verlede jaar op Woensdag, 21 Augustus, gesluit was ten einde die Bakwena en sy kontrakteurs geleentheid te gee om die R24 wat onderdeur die brug loop, na 'n "dual carriageway" te omskep. Feitlik presies 21 jaar sedert die Bakwena N4 deur die "hart" van Rustenburg aangelê is, het die verkeersdruk nou tot só 'n mate toegeneem dat die verdubbeling van die R24 (met ander woorde - twee bane in onderskeidelik 'n oostelike en westelike rigting) nie langer uitgestel kon word nie.

Die goeie nuus dus: Na presies 10 maande sien Rustenburgers vandeesweek die heropening van die Krugerstraat-brug wat ampelik vir enige dag van Woensdag tot Vrydag geskeduleer is. Trouens, tot ons verbasing het verskeie videos wat duidelik toon hoe motoriste oor Krugerstraatbrug ry, Dinsdagoggend al op sosiale media opgeduik. Blykbaar was van die waarskuwingstekens oor konstruksiewerk vorentoe intussen toe ook reeds verwyder?