Bestuurskool 'n goeie opsie voor jy die pad vat

Een van die mylpale in talle jongmense se lewens is om hul bestuurderslisensie te bekom.

- Maretha Swanepoel

Volgens die wet is die minimum ouderdom om vir 'n leerlinglisensie aansoek te doen 17 jaar. Met 'n geldige leerlinglisensie mag 'n persoon op 'n openbare pad bestuur, mits dit volgens die voorgeskrewe voorwaardes geskied.

Polokwane Observer het met Hennie Retief van Hennie Retief Ryskool gesels om meer lig te werp op die proses.

"Dit is nie noodsaaklik om eers by 'n bestuurskool aan te sluit nie, maar dit is belangrik dat die persoon wat jou leer bestuur, weet wat hy of sy doen," sê Retief.

Om 'n afspraak vir 'n leerlinglisensie te maak, benodig 'n aansoeker 'n geldige oogtoetsverslag, twee ID-foto's en die vereiste fooi. 'n Datum om die toets af te lê word daarna deur die eNaTIS-stelsel gegenereer. Sodra die toets geslaag is, moet 'n verdere fooi betaal word om die leerlinglisensie uitgereik te kry.

Volgens Retief maak baie mense onnodige foute tydens die skriftelike toets. "Hulle lees nie die vrae behoorlik nie en is te haastig. Dit is belangrik om te verstaan wat presies gevra word," waarsku hy.