அரசு கல்லூரி மாணவர்களுக்கு திறன் பயிற்சி வழங்கி வேலைவாய்ப்பினை வழங்க ஏற்பாடு செய்த முதல்வர்

தமிழ்நாட்டில் இளைஞர்களின் வேலைவாய்ப்புக்கென தொழில்துறையின் தேவை சார்ந்த திறன் மேம்பாட்டு பயிற்சிகளை வழங்க நான் முதல்வன் எனும் திட்டத்தை தமிழ்நாடு முதலமைச்சர் 2022 ஆம் ஆண்டு மார்ச் மாதம் தொடங்கி வைத்தார்.

- 

இத்திட்டத்தின் மூலம் கல்லூரி பாடத்திட்டத்தில் வழங்கப்படும் வழக்கமான பாடப்பிரிவுகளுடன் மாறிவரும் தொழில்நுட்ப உலகிற்கு ஏற்ப திறன் படிப்புகளும் இணைந்து வழங்கப்படுகிறது. பல்வேறு படிப்புகள் பற்றிய அவ்வப்போதைய சமீபத்திய தகவல்களையும், தொழில் துறைகளுக்குத் தேவையான குறிப்பிட்ட திறன்கள் தொடர்பான தகவல்கள் குறித்தும், கல்லூரி மாணவர்கள் தெரிந்து கொள்ளும் வகையில் அனைத்து விவரங்களையும் வழங்குவதே நான் முதல்வன் தளத்தின் நோக்கமாகும். இது தமிழ்நாட்டில் உள்ள மாணவர்கள் தங்களுடைய வாழ்க்கை இலட்சியங்களை அடையும் வகையில், தங்களுக்கு விருப்பமான துறையில் பயிற்சி பெற உதவுகிறது. தொழில்துறையில் தற்போதுள்ள பணியிட இடைவெளிகளை நிரப்பக்கூடிய திறன் கொண்டவர்களாக மாணவர்களை உருவாக்கும் வகையில் பல்வேறு திறன் பயிற்சிகளை அவர்களுக்கு அளிப்பதற்கான ஆற்றல்மிகு பயிற்றுனர்களை அடையாளம் காண்பதும் இத்திட்டத்தின் குறிக்கோளாகும்.

நான் முதல்வன் மாநிலம் முழுவதும் உள்ள 18 முதல் 35 வயதுக்குட்பட்ட இளைஞர்களுக்கு பல்வேறு மாநிலம் மற்றும் மத்திய அரசின் உதவி திட்டங்களின் கீழ் இலவச வேலை வாய்ப்புடன் தொடர்புடைய திறன் மேம்பாட்டு பயிற்சிகளை வழங்குகிறது. தேசிய அளவில் சான்றளிக்கப்பட்ட இந்த பயிற்சி வகுப்புகள் பதிவு செய்யப்பட்ட பயிற்சி நிறுவனங்கள் மூலம் சுகாதாரம், ஊடகம், பொழுதுபோக்கு, பசுமை சார்பணிக, சில்லறை வணிகம், அழகு கலை, கட்டுமானம், மின்னணுவியல், வன்பொருள், உணவு பதப்படுத்துதல், தோல், சரக்கு போக்குவரத்து, தகவல் தொழில்நுட்பம் மற்றும் தகவல் தொழில்நுட்பம் சார்ந்த சேவைகள் போன்ற 20க்கும் மேற்பட்ட வெவ்வேறு துறைகளில் மாநிலம் முழுவதும் உள்ள நகர்ப்புற மற்றும் கிராமப்புறங்களில் உள்ள மையங்களில் நடத்தப்படுகின்றன.

நான் முதல்வன் திட்டத்தின் வாயிலாக மாணவர்களுக்கு தொழில்துறை தொடர்பான, அதற்குத் தேவையான தொழில்நுட்ப திறன்கள், தனிப்பட்ட திறன்கள், நிறுவன திறன்கள் ஆகியவற்றில் திறன் பயிற்சிகள் கிடைக்கும். சர்வதேச அங்கீகாரம் பெற்ற கல்வித்துறை நிறுவனங்களுடன் இணைந்து ஆங்கில மொழித் திறன் வழங்கப்படும்.