Prosedure maak meer orgaanskenkings moontlik

'n Nuwe prosedure wat dit moontlik maak om 'n nier oor te plant waar die skenker se bloedgroep onversoenbaar is met dié van die ontvanger, het vir Alred du Plessis van George 'n nuwe lewe moontlik gemaak.

- Alida de Beer

Alred du Plessis en sy swaer, Henro Nel, in die hospitaal net voor hulle operasies.

Du Plessis (43) het eindstadium nierversaking gehad en sou moontlik vir jare vir 'n nier moes wag, maar danksy die nuwe prosedure kon hy sy swaer, Henro Nel, se een nier op 18 November in 'n oorplantingsoperasie in die Universiteit Kaapstad Privaat Hospitaal ontvang. Du Plessis se bloedgroep is O-positief en Nel is A-positief.

Du Plessis se dokter, Alda Vermeulen, 'n nefroloog en hoof van die kliniese eenheid by Interne Medisyne by die George-hospitaal, sê die gemiddelde wagtyd vir 'n nier is vyf tot tien jaar, want die pasiënt moet gewoonlik wag dat 'n geskikte skenker sterf. Hulle probeer dus lewende skenkers vir pasiënte vind. Die kanse is beter om 'n geskikte skenker te vind deur die gebruik van 'n spesiale filter (genoem Glycosorb-filter of immuno-absorbsiekolom) wat bloedgroepteenliggaampies verwyder.