Fluit-fluit, ons klubrugby is uit

"Dis die grootste klomp tjol wat ek al ooit 'n skeidsregter sien blaas het!

- Wyndham Ewerts

"Ek wonder hoeveel geld hy gekry het, want dis duidelik hy is omgekoop!"

"Nee hel, Mister Ref, jy kort 'n vars oogtoets - niemand kan só blind wees nie!"

Dit is maar net 'n paar van die beledigings en weggooisêgoed wat rugbyskeidsregters gereeld moet aanhoor. Dit maak nie saak watter kant van die ewenaar jy jouself bevind nie, die skeidsregter is altyd die maklike teiken.

Wie kan ooit die huidige Bokafrigter, Rassie Erasmus, se skerp kritiek teen skeidsregters in 2022 vergeet, waarvoor hy vir twee internasionale wedstryde geskors is? Ná die tyd moes Erasmus om verskoning vra en erken dat skeidsregters groter respek verdien, maar ironies genoeg het die standaard van fluitjieblasers se beslissings daarna aansienlik verhoog.

'n Jong skeidsregter, 'n harde les

Die jongste geval waar skeidsregters op plaaslike vlak weer onder die vergrootglas gekom het was verlede week toe die Bridgton-rugbyklub in Oudtshoorn met R100 000 beboet is (slegs R40 000 betaalbaar, die res opgeskort) as 'n sanksie deur die SWD-rugbyunie nadat 'n jong skeidsregter op hul tuisveld by Die Plate glo aangeval is en ligte harsingskudding opgedoen het.

Beide spanne, Bridgton en Evergreens van George, het die skeidsregter probeer beskerm deur 'n menseskild rondom hom te vorm, maar dit was nie die punt nie.

Iemand moes gestraf word, en ongelukkig, omdat Bridgton die gasheer vir hierdie wedstryd was, moes hulle die spit afbyt.