கூடலழகர் பெருமாள் கோயில் தேரோட்டம்

புதிய வசதியைத் தொடங்கிவைத்தார் முதல்வர்

- 

மதுரை, ஜூன் 10: மதுரை கூடலழகர் பெருமாள் கோயில் வைகாசிப் பெருந்திருவிழாவையொட்டி, செவ்வாய்க்கிழமை தேரோட்டம் நடைபெற்றது. இதில் திரளான பக்தர்கள் பங்கேற்றனர். இந்தக் கோயிலில் கடந்த 2-ஆம் தேதி கொடியேற்றத்துடன் வைகாசிப் பெருந்திருவிழா தொடங்கியது.

தினமும் காலை 11 மணிக்கு பல்லக்கில் பெருமாள் வீதியுலாவும், மாலையில் வெவ்வேறு வாகனங்களில் பெருமாள் புறப்பாடும் நடைபெற்றன.

இதில் முக்கிய நிகழ்வான தேரோட்டத்தையொட்டி, செவ்வாய்க்கிழமை அதிகாலை 5.45 மணி அளவில் சிறப்பு அலங்காரத்தில் உபய நாச்சியார்களுடன் வியூக சுந்தரராஜப் பெருமாள் தேரில் எழுந்தருளினார். இதையடுத்து, வேத மந்திரங்கள், மங்கள வாத்தியங்கள் முழங்க காலை 6.15 மணி அளவில் தேர் வடம்பிடிக்கப்பட்டது.

மாநகராட்சி மேயர் வ. இந்திராணி, மதுரை தெற்குத் தொகுதி சட்டப்பேரவை உறுப்பினர் மு. பூமிநாதன், மாநகராட்சி மண்டலத் தலைவர் பாண்டிச்செல்வி, இந்து சமய அறநிலையத் துறை உதவி ஆணையர் மு. பிரதிபா, கோயில் பேஷ்கர் வ. இந்திரன், மாமன்ற உறுப்பினர்கள், அறநிலையத் துறை அலுவலர்கள் ஆகியோர் வடம் பிடித்து இழுத்து தேரோட்டத்தைத் தொடங்கி வைத்தனர்.