வக்ஃப் சட்டத் திருத்த மசோதாவுக்கு எதிர்ப்பு: இஸ்லாமியர்கள் ஆர்ப்பாட்டம்

மத்திய அரசு கொண்டு வந்துள்ள வக்ஃப் சட்டத் திருத்த மசோதாவுக்கு எதிர்ப்புத் தெரிவித்து இஸ்லாமியர்கள் வெள்ளிக்கிழமை ஆர்ப்பாட்டத்தில் ஈடுபட்டனர்.

- 

சிவகங்கை/ கமுதி/ ஸ்ரீவில்லிபுத்தூர்/ ராஜபாளையம், ஏப்.4: மத்திய அரசு கொண்டு வந்துள்ள வக்ஃப் சட்டத் திருத்த மசோதாவுக்கு எதிர்ப்புத் தெரிவித்து இஸ்லாமியர்கள் வெள்ளிக்கிழமை ஆர்ப்பாட்டத்தில் ஈடுபட்டனர்.

சிவகங்கை தலைமை பள்ளிவாசலான வாலாஜா நவாப் ஜும்ஆ பள்ளிவாசலில் பிற்பகலில் தொழுகை முடித்த முஸ்லிம்கள் அனைவரும் கருப்புப் பட்டை அணிந்து நடத்திய ஆர்ப்பாட்டத்துக்கு, பள்ளிவாசல் நிர்வாகத் தலைவர் காஜா முகைதீன் தலைமை வகித்தார். பள்ளிவாசல் தலைமை இமாம் முகம்மது பிலால் முன்னிலை வகித்தார்.

இந்த ஆர்ப்பாட்டத்தில் பங்கேற்ற அனைவரும் வக்ஃப் சட்டத் திருத்த மசோதாவுக்கு எதிராகவும், மத்திய அரசுக்கு எதிராகவும் கண்டன முழக்கங்களை எழுப்பினர். மேலும், பள்ளிவாசல் முழுவதும் கருப்பு கொடிகள் கட்டப்பட்டிருந்தன. இந்த ஆர்ப்பாட்டம் காரணமாக நேரு பஜார் பகுதியில் சுமார் அரை மணி நேரம் போக்குவரத்து பாதித்தது.