நாடாளுமன்றம் - அன்றும் இன்றும்..

நாடாளுமன்ற ஜனநாயகம் வலுப்பட உறுப்பினர்கள் கேட்கும் கேள்விகளுக்கு ஜனநாயக அணுகுமுறையுடன் பதில் சொல்லப்பட வேண்டும். குறிப்பிட்ட விஷயங்களை மட்டும்தான் சொல்லுவேன் என்று பிடிவாதம் பிடிப்பது ஜனநாயகமாகாது.

- கோ. விசுவநாதன்

திநிலை அறிக்கை கூட்டத் தொடரின் முதல் அமர்வில் ஒரு நல்ல சூழலில் விவாதங்கள் நடைபெற்றதில் மகிழ்ச்சி அடைகிறேன். குடியரசுத் தலைவர் உரைக்கு நன்றி தெரிவிக்கும் தீர்மானத்தின் மீது 17.23 மணி நேரம் பயனுள்ள விவாதங்கள் நடந்தன. இதில் 173 உறுப்பினர்கள் தங்கள் கருத்துகளைத் தெரிவித்தனர். நிதிநிலை அறிக்கை மீதான பொது விவாதம் 170 உறுப்பினர்களின் பங்கேற்புடன் 16.13 மணி நேரம் நடந்தது. உங்கள் ஒத்துழைப்புடன் இந்த அமர்வில் நாடாளுமன்றத்தின் செயல் திறன் சுமார் 112 சதவீதமாக இருந்தது. பட்ஜெட்டில் இரண்டாம் கட்ட தொடரிலும் உங்கள் ஆதரவை நான் தொடர்ந்து பெறுவேன் என்று நம்புகிறேன்” என்று முதல் கட்ட அமர்வு முடியும் நிறைவு நாள் அன்று அவையை ஒத்திவைப்பதற்கு முன்பு அவைத் தலைவர் ஓம் பிர்லா பதிவு செய்தார்.

ஒரு நிமிஷத்துக்கு நாடாளுமன்றம் செயல்பட 2.5 லட்சம் ரூபாய் செலவாகிறது என்கிறது நாடாளுமன்ற செய்திக்குறிப்பு. இது மக்கள் வரிப்பணம் என்ற பொறுப்புடன் நாடாளுமன்ற உறுப்பினர்கள் செயல்பாடு இருக்க வேண்டும். சமீபத்திய குளிர்கால கூட்டத் தொடரில் சரிவர விவாதம் செய்யாமல் வெளிநடப்பு, சபை முடக்கம் இவற்றின் காரணமாக 97.8 கோடி ரூபாய் வீணாகிப் போய்விட்டது என்பதையும் அந்த செய்திக் குறிப்பு சொல்கிறது.

என்னைப் பொருத்தவரை நான் நாடாளுமன்ற உறுப்பினராகவும் இருந்திருக்கிறேன், சட்டப்பேரவை உறுப்பினராகவும் இருந்திருக்கிறேன். நாடாளுமன்றத்தில் நான் பத்து ஆண்டுகள் தொடர்ந்து உறுப்பினராக இருந்தேன். அந்த காலத்தில் பொறுப்புடனும் கவலையுடனும் மிகுந்த அக்கறையுடனும் கவனத்துடன் விவாதிக்கும் ஒரு இடமாக நாடாளுமன்றம் இருந்தது.