வெளிநாட்டு மாணவர் விசா நடைமுறையை மீண்டும் தொடங்கிய அமெரிக்கா

சமூக ஊடக கணக்கு ஆய்வுக்கு மறுத்தால் விண்ணப்பம் ரத்து

- 

வாஷிங்டன், ஜூன் 19: நிறுத்தி வைக்கப்பட்டிருந்த வெளிநாட்டு மாணவர்களுக்கான நுழைவு இசைவு (விசா) வழங்கும் நடைமுறைகள் மீண்டும் தொடங்கப்பட்டிருப்பதாக அமெரிக்கா புதன்கிழமை அறிவித்தது.

ஆனால், 'அமெரிக்காவுக்கு வர நுழைவு இசைவு கோரி புதிதாக விண்ணப்பிக்கும் மாணவர்கள், தங்களின் சமூக ஊடக கணக்குகளை நுழைவு இசைவு விண்ணப்பத்தைப் பரிசீலிக்கும் தூதரக அதிகாரி ஆய்வு செய்ய அனுமதிக்க வேண்டும் என்ற புதிய நிபந்தனை விதிக்கப்பட்டுள்ளது' என்று தெரிவித்துள்ளது.

அமெரிக்க அதிபராக டொனால்ட் டிரம்ப் மீண்டும் பொறுப்பேற்ற பிறகு, உயர்கல்வி கற்க அமெரிக்காவுக்கு வரும் வெளிநாடுகளைச் சேர்ந்த மாணவர்களுக்கு கடும் கட்டுப்பாடுகள் விதிக்கப்பட்டு வருகின்றன.

இந்தச்சூழலில், அமெரிக்காவின் புகழ்பெற்ற ஹார்வர்டு பல்கலைக்கழகத்தில் படித்துவரும் வெளிநாட்டு மாணவர்கள், பாலஸ்தீனத்துக்கு ஆதரவாக பல்கலைக்கழக வளாகத்துக்குள் கடந்த மாதம் போராட்டத்தில் ஈடுபட்டது பெரும் சர்ச்சையானது.