படைப்புக் கலையை வளர்க்க...

'உழுது உழுது ஒருவன் உழவனாவதுபோல, எழுதி எழுதி ஒருவன் எழுத்தாளன் ஆக வேண்டும்' என்பார் எழுத்தாளர் ஜெயகாந்தன். உழவுத் தொழில் கற்றுக்கொள்ள, வேளாண்மைப் பல்கலைக்கழகங்கள் இருக்கின்றன. பல கலைகள் வளர்க்கும் பல்கலைக்கழகங்களில், படைப்பிலக்கியத்தை முறையாகப் பயிற்றுவிக்க ஒரு துறைகூட இல்லையே!

- கிருங்கை சேதுபதி

சில ஆண்டுகளுக்கு முன் ஒரு இலக்கியப் பயிலரங்கில் பங்கேற்கச் சென்றிருந்தபோது, அயலகத்திலிருந்து வருகை தந்திருந்த ஒரு படைப்பாளி என்னிடம் கேட்டார்: 'ஆண்டுதோறும் பட்டதாரிகளை உருவாக்கித் தருகிற கல்வி நிறுவனங்களில் இருந்து படைப்பாளிகளாக வெளிவந்தவர்கள் எத்தனை பேர்?

வினாவிற்கு உரிய பதிலை அப்போது விரிவாகச் சொல்ல முடியவில்லை. எனினும், எனக்குத் தெரிந்த பட்டதாரிகளாக வெளிவந்து படைப்பாளிகளாக விளங்கிய சிலரை, சொல்லிச் சமாளித்தேன். அவர்கள் எல்லாம் ஒருதுறை சார்ந்தவர்கள் அல்லர்; வெவ்வேறு பணிகளில் இருந்துகொண்டே எழுதியவர்கள்; எழுதி வருகிறவர்கள்.

மருத்துவர், பொறியாளர் என்பது போல் எழுத்தாளர், கவிஞர் என எழுதும் பணியே தன் பணியாய்க் கொண்டு, அதன்மூலம் பொருளாதாரத்திலும், பிற நிலைகளிலும் தன்னிறைவு பெற்று வாழுகிற முழுநேர எழுத்தாளர்கள், கவிஞர்கள் எத்தனை பேர் என்பது கேள்விக்குறியாக இருக்கிறது.

இருந்தாலும், குழந்தைகளுக்கான படைப்புகள் நல்குவதையே வாழ்வியல் நோக்கமாகக் கொண்டு செயல்புரிந்த அழ.வள்ளியப்பா, தன்னைக் குழந்தைக் கவிஞராகவே தகவமைத்துக் கொண்டார்; தன் காலத்தில் எழுத வந்தவர்களை அடையாளம் கண்டு சிறுவர்களுக்கான படைப்புகள் உருவாக நெறிப்படுத்தினார்; இளங்குழந்தைகளுக்கும் தான் பொறுப்பேற்ற சிறுவர் இலக்கிய இதழ்மூலம் எழுத வாய்ப்பளித்தார். தனி நூல்கள் எழுதி வெளியிட உதவினார்.