ராமேசுவரம் மீனவர்கள் ரயில் மறியல் போராட்டம்

இலங்கை சிறையில் உள்ள மீனவர்களையும், படகுகளையும் விடுவிக்க மத்திய, மாநில அரசுகள் உடனடி நடவடிக்கை எடுக்க வலியுறுத்தி, தங்கச்சிமடத்தில் ராமேசுவரம் மீனவர்கள் ரயில் மறியல் போராட்டத்தில் செவ்வாய்க்கிழமை ஈடுபட்டனர்.

- 

ராமேசுவரம், ஆக. 19:

தமிழகத்தில் மீன்பிடி தடைக்காலம் நிறைவடைந்து, ராமநாதபுரம் மாவட்டம், ராமேசுவரம், பாம்பன் உள்ளிட்ட பகுதிகளிலிருந்து கடலுக்குள் மீன்பிடிக்கச் சென்ற மீனவர்கள் 50-க்கும் மேற்பட்டோரை இலங்கை கடற்படையினர் கைது செய்தனர். மேலும், அவர்களது படகுகளையும் பறிமுதல் செய்தனர். எல்லை தாண்டி மீன்பிடித்ததாக மீனவர்கள் மீது வழக்குப் பதிந்து, நீதிமன்றத்தில் முன்னிலைப்படுத்தி சிறையில் அடைத்தனர்.

இலங்கை சிறையில் உள்ள தமிழக மீனவர்களையும், அவர்களது படகுகளையும் விடுவிக்க மத்திய, மாநில அரசுகள் உடனடி நடவடிக்கை எடுக்கக் கோரி, ராமேசுவரம் மீனவர்கள் கடந்த 11-ஆம் தேதி முதல் காலவரையற்ற வேலைநிறுத்தப் போராட்டத்தில் ஈடுபட்டு வருகின்றனர்.