காஞ்சா கட்சிபௌலி நில விவகாரம்: மாற்றுத் திட்டத்தை சமர்ப்பிக்கவும்

தெலங்கானா அரசுக்கு உச்சநீதிமன்றம் உத்தரவு

- 

புது தில்லி, ஏப்.16: ஹைதராபாத் பல்கலைக்கழகத்துக்கு அருகில் உள்ள நிலத்தில் மரங்களை வெட்டுவதில் தீவிரம் காட்டிய தெலங்கானா அரசு, அங்குள்ள 100 ஏக்கர் வனப்பகுதியை மீட்டமைப்பதற்கான மாற்றுத் திட்டத்தை 4 வாரங்களுக்குள் சமர்ப்பிக்க வேண்டும் என உச்சநீதிமன்றம் புதன்கிழமை உத்தரவிட்டது.

இந்த விவகாரத்தில் மாநில தலைமைச் செயலர் மீது கடும் நடவடிக்கை எடுக்காமல் இருக்க வேண்டுமெனில் மாற்றுத் திட்டத்தை சமர்ப்பிக்க வேண்டும் எனவும் அதுவரை அந்தப் பகுதியில் ஒரு மரத்தைக்கூட வெட்டக்கூடாது எனவும் உச்சநீதிமன்றம் தெரிவித்தது.

தெலங்கானா மாநிலம் காஞ்சா கட்சிபெளலியில், ஹைதராபாத் பல்கலைக்கழகத்துக்கு அருகில் உள்ள 400 ஏக்கர் நிலத்தில் அந்த மாநில அரசு உள்கட்டமைப்புத் திட்டங்களை மேற்கொள்ளவுள்ளதாக கூறி பல்கலைக்கழக மாணவர்கள் போராட்டத்தில் ஈடுபட்டனர்.

இந்த நிலம் பல்கலைக்கழகத்துக்கு சொந்தமானது என மாணவர்களும் அரசுக்குச் சொந்தமானது என மாநில அரசும் தொடர்ந்து தெரிவித்து வருகின்றனர்.