உலக சுற்றுச்சூழல் தினம்

திருவாரூர் மாவட்ட ஆட்சியர் அலுவலக வளாகத்தில், மாவட்ட வனத்துறை மற்றும் மாசுக்கட்டுப்பாட்டுத் துறை சார்பில் உலக சுற்றுச்சூழல் தினத்தை முன்னிட்டு மரக்கன்றுகள் வியாழக்கிழமை நடப்பட்டன.

- 

திருவாரூர், ஜூன் 5:

சட்டப்பேரவை உறுப்பினர் பூண்டி கே. கலைவாணன், மாவட்ட வருவாய் அலுவலர் கலைவாணி, மாவட்டக் கல்வி அலுவலர் சௌந்தரராஜன் ஆகியோர் மரக்கன்றுகளை நட்டு வைத்து, சுற்றுச்சூழலை பாதுகாக்க நெகிழியை பயன்படுத்துவதைத் தவிர்த்து மஞ்சப்பை பயன்படுத்துவோம், இயற்கையைப் பாதுகாத்து மரம் வளர்ப்போம், மழை பெறுவோம் என விழிப்புணர்வு ஏற்படுத்தினர்.

தொடர்ந்து, திருவாரூர் அரசு மருத்துவக் கல்லூரி மாணவ, மாணவிகள் பங்கேற்று, மரக்கன்றுகளை நட்டு வைத்தனர். மேலும், மஞ்சப்பைகளை பெற்றுக்கொண்டு, நெகிழி பயன்படுத்த மாட்டோம் என உறுதி ஏற்றனர். மாவட்ட வன அலுவலர் ஸ்ரீகாந்த் ஏற்பாட்டில் நடைபெற்ற நிகழ்வில் வனச்சரக அலுவலர்கள் சைதனி, ரஞ்சித், வனவர் இந்துமதி உள்ளிட்டோர் பங்கேற்றனர்.

கூத்தாநல்லூர்: கூத்தாநல்லூர் டெல்டா பப்ளிக் பள்ளி மாணவர்கள் சார்பில், உலக சுற்றுச்சூழல் தினத்தை முன்னிட்டு விழிப்புணர்வு பேரணி வியாழக்கிழமை நடைபெற்றது.