சர்க்கரை பலகைகள்!

மத்திய இடைநிலைக் கல்வி வாரியம் தனது கட்டுப்பாட்டில் உள்ள பள்ளிகளுக்கு அண்மையில் அனுப்பிய சுற்றறிக்கை கவனம் பெற்றுள்ளது.

- 

அதாவது, மாணவ, மாணவிகள் இனிப்புகளை அதிகம் உண்பதால் ஏற்படும் ஆபத்துகள் தொடர்பாக விழிப்புணர்வு ஏற்படுத்தவும், சிறந்த உணவுப் பழக்கங்களை ஊக்குவிக்கும் வகையிலும் பள்ளி வளாகங்களில் சர்க்கரை நோய் விழிப்புணர்வுப் பலகைகளை நிறுவவேண்டும் என்று அதில் குறிப்பிடப்பட்டிருந்தது.

கடந்த பத்தாண்டுகளாக சர்க்கரை நோயால் குழந்தைகள் பாதிக்கப்படுவது அதிகரித்து வருகிறது. குறிப்பாக, சர்க்கரை நோயின் இரண்டாம் வகையால் (டைப் 2) பலரும் பாதிக்கப்பட்டுள்ளனர்.

பெரியவர்கள் மட்டுமே சர்க்கரை நோய் பாதிப்புக்குள்ளான நிலையில், மாணவர்கள் இந்த இரண்டாம் வகை சர்க்கரை நோயால் பாதிக்கப்படுவதற்கு இனிப்பு அதிகம் சேர்க்கப்பட்ட தின்பண்டங்கள், குளிர்பானங்கள், பதப்படுத்தப்பட்ட உணவுகள் போன்றவை பள்ளிக்கு வெளியேயும், பள்ளிகளில் இயங்கும் கேண்டீன்களிலும் எளிதாக கிடைப்பது பிரதான காரணமாகக் கூறப்படுகிறது.

இனிப்புகளை அதிகமாகச் சாப்பிடுவது சர்க்கரை நோயின் தாக்கத்தை அதிகரிப்பதுடன் மட்டுமல்லாமல், உடல் பருமன், பல் பிரச்னைகள் மற்றும் பிற வளர்சிதை மாற்றக் கோளாறுகள் வருவதற்கும் வாய்ப்பாகிறது. மேலும், குழந்தைகளின் நீண்டகால ஆரோக்கியம், கல்வி செயல்திறனும் பாதிக்கப்படுகிறது.

4 முதல் 10 வயது வரையிலான குழந்தைகள் சராசரியாக தினமும் சாப்பிடும் உணவுகளில் சர்க்கரை 13% ஆகவும், 11 முதல் 18 வயது வரையிலானவர்களுக்கு 15% ஆகவும் உள்ளது; இந்த அளவு 5% மட்டுமே இருக்க வேண்டும் என உலக சுகாதார அமைப்பால் பரிந்துரைக்கப்பட்டுள்ளது.