கனடாவுடன் வர்த்தகப் பேச்சை ரத்து செய்தார் ட்ரம்ப்

டிவி விளம்பரத்தால் சர்ச்சை

- 

அமெரிக்காவின் கூடுதல் வரி விதிப்புகளுக்கு எதிராக கனடா அரசு வெளியிட்டுள்ள தொலைக்காட்சி விளம்பரத்துக்கு எதிர்ப்பு தெரிவித்து, அந்த நாட்டுடனான வர்த்தகப் பேச்சுவார்த்தைகளை ரத்து செய்வதாக அமெரிக்க அதிபர் டொனால்ட் டிரம்ப் அறிவித்துள்ளார்.

அந்த விளம்பரத்தின் மூலம் உச்சநீதிமன்ற முடிவுகளில் தாக்கத்தை ஏற்படுத்த கனடா முயல்வதால் இந்த முடிவை எடுத்துள்ளதாக அவர் கூறினார்.

இதுகுறித்து தனது ட்ரூத் சமூக ஊடகத் தளத்தில் டிரம்ப் வெளியிட்டுள்ள பதிவுகளில் தெரிவிக்கப்பட்டுள்ளதாவது:

கூடுதல் வரி விதிப்பு குறித்து அமெரிக்க முன்னாள் அதிபர் ரொனால்ட் ரீகன் எதிர்மறையாகப் பேசுவதுபோல் கனடா அரசு பொய்யான விளம்பரத்தை வெளியிட்டுள்ளது. அந்த விளம்பரத்தை வெளியிட்டதன்மூலம் கனடா அரசு மோசடியில் ஈடுபட்டதாக ரொனால்ட் ரீகன் அறக்கட்டளை அறிவித்துள்ளது.