ஆரணி, செய்யாற்றில் விநாயகர் சிலைகள் விசர்ஜன ஊர்வலம்

திருவண்ணாமலை மாவட்டம், ஆரணி நகரம், இராட்டிணமங்கலம், செய்யாறு மற்றும் தேவிகாபுரத்தில் ஹிந்து முன்னணி சார்பில் விநாயகர் சிலைகள் விசர்ஜன ஊர்வலம் ஞாயிற்றுக்கிழமை நடைபெற்றது.

- 

ஆரணி/ போளூர், செய்யாறு, ஆக.31: திருவண்ணாமலை மாவட்டம், ஆரணி நகரம், இராட்டிணமங்கலம், செய்யாறு மற்றும் தேவிகாபுரத்தில் ஹிந்து முன்னணி சார்பில் விநாயகர் சிலைகள் விசர்ஜன ஊர்வலம் ஞாயிற்றுக்கிழமை நடைபெற்றது.

ஆரணி நகரில் விநாயகர் சதுர்த்தியையொட்டி, ஹிந்து முன்னணி சார்பில் சுமார் 50 விநாயகர் சிலைகள் வைக்கப்பட்டு சிறப்பு பூஜைகள் நடைபெற்று வந்தன. அமைக்கப்பட்ட விநாயகர் சிலைகள் ஊர்வலமாகக் கொண்டு சென்று கரைக்கும் நிகழ்ச்சி ஆரணி அண்ணா சிலை அருகே ஹிந்து முன்னணி மாவட்டச் செயலர் தாமோதரன் தலைமையில் தொடங்கியது.

நிகழ்ச்சியில் தொழிலதிபர்கள் ஆ.பெ.வெங்கடேசன், ஜி.ஏ.கோகுலகிருஷ்ணன், பாஜகவைச் சேர்ந்த தீனன், பி.கோபி ஆகியோர் முன்னிலை வகித்தனர்.

ஹிந்து முன்னணி ஒருங்கிணைப்பாளர் விக்னேஷ் வரவேற்றார். சிறப்பு அழைப்பாளராக தேசிய சிந்தனைக் கழக மாநில அமைப்பாளர் மா.கொ.சி.ராஜேந்திரன், இரா.குமரேசன், பாஜக மத்திய நலத்திட்ட பிரிவு மாநிலச் செயலர் சைதை வ.சங்கர் ஆகியோர் கலந்து கொண்டு கொடியசைத்து ஊர்வலத்தைத் தொடங்கி வைத்தனர்.

பாஜக மாவட்டத் தலைவர் கவிதா வெங்கடேசன், மாவட்ட பொதுச் செயலர் சதீஷ் ஆகியோர் வாழ்த்துரை வழங்கினர்.

ஊர்வலத்தில் மேளதாளம் முழங்க சிலம்பாட்டம், ஒயிலாட்டம், மயிலாட்டம் இடம்பெற்றது. 14 விநாயகர் சிலைகள் விழாக் குழுவினர் ஊர்வலத்தில் கலந்து கொண்டனர்.

இதில் முதல் விநாயகராக இயந்திர வடிவிலான பிரம்மாண்டமான யானை சிலையை தொடர்ந்து அனைத்து விநாயகர் சிலைகளும் அணி வகுத்துச் சென்றன.