பிரதமர் மோடி 5 நாடுகள் பயணம் தொடக்கம்

கானா, டிரினிடாட்-டொபாகோ குடியரசு, அர்ஜென்டீனா, பிரேஸில், நமீபியா ஆகிய ஐந்து நாடுகளுக்கான ஒருவார அரசுமுறைப் பயணத்தை பிரதமர் நரேந்திர மோடி புதன்கிழமை தொடங்கினார்.

- 

புது தில்லி, ஜூலை 2:

முதலாவதாக ஆப்பிரிக்க நாடான கானாவுக்கு அவர் புறப்பட்டுச் சென்றார். பிரேஸிலில் ஜூலை 6, 7 ஆகிய தேதிகளில் நடைபெறும் பிரிக்ஸ் கூட்டமைப்பின் உச்சி மாநாட்டில் பிரதமர் பங்கேற்கவுள்ளார்.

ஐந்து நாடுகள் பயணம் தொடங்கும் முன், பிரதமர் வெளியிட்ட செய்திக்குறிப்பில் கூறப்பட்டுள்ளதாவது: கானா அதிபர் ஜான் டிராமனி மஹாமாவின் அழைப்பின் பேரில், ஜூலை 3-ஆம் தேதி வரை அந்நாட்டில் பயணம் மேற்கொள்கிறேன். தெற்குலகில் இந்தியாவின் மதிப்புமிக்க நட்பு நாடு கானா. ஆப்பிரிக்க யூனியனிலும், மேற்கு ஆப்பிரிக்க நாடுகளின் பொருளாதார சமூகத்திலும் முக்கியப் பங்கு வகிக்கிறது. வரலாற்று ரீதியிலான இருதரப்பு உறவுகளை மேலும் வலுப்படுத்துவதுடன், முதலீடு, எரிசக்தி, சுகாதாரம், பாதுகாப்பு, திறன் மேம்பாடு உள்ளிட்ட துறைகளில் ஒத்துழைப்புக்கான புதிய வாயில்களை திறப்பதையும் நோக்கமாக கொண்ட கருத்துப் பரிமாற்றங்களை எதிர்நோக்குகிறேன். சக ஜனநாயக நாடாக, கானா நாடாளுமன்றத்தில் உரையாற்றவிருப்பதை கௌரவமாக கருதுகிறேன்.