கழிவுநீர் சுத்திகரிப்பு நிலையம் அமைக்க எதிர்ப்பு: பொதுமக்கள் போராட்டம்

திருவத்திபுரம் (செய்யாறு) நகராட்சி அம்பேத்கர் நகர் பகுதியில் கழிவுநீர் சுத்திகரிப்பு நிலையம் அமைப்பதற்கு எதிர்ப்புத் தெரிவித்து, சார்-ஆட்சியர் அலுவலகத்தை பொதுமக்கள் செவ்வாய்க்கிழமை முற்றுகையிட்டு தர்னாவில் ஈடுபட்டனர்.

- 

செய்யாறு, ஜூலை 17:

திருவண்ணாமலை மாவட்டம், திருவத்திபுரம் (செய்யாறு) நகராட்சிக்கு உள்பட்ட 21-ஆவது வார்டு அம்பேத்கர் நகரில் அரசுக்குச் சொந்தமான சுமார் 4.5 ஏக்கரில் மயானப் பகுதி அமைந்துள்ளது. இங்கு அம்பேத்கர் நகரைச் சேர்ந்தவர்கள் இறந்தவர்களின் உடல்களை பல தலைமுறைகளாக அடக்கம் செய்து வருவதாகத் தெரிகிறது.

இந்த நிலையில், அம்பேத்கர் நகர் பகுதியில் தமிழக அரசு சார்பில் ரூ.12 கோடியில் கழிவுநீர் சுத்திகரிப்பு நிலையம் அமைக்க நகராட்சி சார்பில் பூர்வாங்கப் பணிகளை மேற்கொண்டதாகத் தெரிகிறது.

கழிவுநீர் சுத்திகரிப்பு நிலையம் அமைப்பதற்கு எதிர்ப்புத் தெரிவித்து, அம்பேத்கர் நகர் பகுதி மக்கள் வட்டாட்சியர் அலுவலகம், சார்-ஆட்சியர் அலுவலகத்தை முற்றுகையிட்டு தர்னாவில் ஈடுபட்டனர்.