முதுநிலை நீட்: கலந்தாய்வுக்கு முன்பே கட்டண விவரங்களை வெளியிடுவது கட்டாயம்

முதுநிலை மருத்துவப் படிப்புகளில் முன்பதிவு நடைமுறை குறித்து கவலை தெரிவித்த உச்சநீதிமன்றம், 'அனைத்து தனியார் மருத்துவக் கல்லூரிகள், பல்கலைக்கழகங்களும் மாணவர் சேர்க்கை கலந்தாய்வுக்கு முன்பாக கட்டண விவரங்களை வெளியிடுவது கட்டாயம்' என்று வியாழக்கிழமை உத்தரவிட்டது.

- 

புது தில்லி, மே 22:

மேலும், 'மருத்துவப் படிப்பு கட்டணத்தை முறைப்படுத்தும் வகையில், தேசிய மருத்துவ ஆணையத்தின் கீழ் தேசிய அளவிலான கட்டண நிர்ணய ஒழுங்காற்று நடைமுறை உருவாக்கப்பட வேண்டும்' என்றும் உச்ச நீதிமன்றம் உத்தரவிட்டது.

உத்தரப் பிரதேச மாநிலத்தில் உள்ள தனியார் மருத்துவக் கல்லூரியில் கலந்தாய்வுக்கு முன்பே அதிக பணம் கொடுத்து முதுநிலை மருத்துவப் படிப்பு இடங்கள் முன்பதிவு செய்யப்படும் நடைமுறையால், இடம் கிடைக்காமல் பாதிக்கப்பட்ட முதுநிலை நீட் தேர்வில் தகுதிபெற்ற இருவர் அலாகாபாத் உயர்நீதிமன்றத்தில் வழக்கு தொடர்ந்தனர். இந்த வழக்கை விசாரித்த உயர் நீதிமன்றம், பாதிக்கப்பட்ட இரு மாணவர்களுக்கு இழப்பீடு வழங்க லக்னௌ மருத்துவக் கல்வி மற்றும் பயிற்சித் துறைத் தலைவருக்கு உத்தரவிட்டது.

இந்த உத்தரவை எதிர்த்து உத்தரப் பிரதேச மாநில அரசு மற்றும் லக்னௌ மருத்துவக் கல்வி மற்றும் பயிற்சித் துறைத் தலைவர் சார்பில் உச்ச நீதிமன்றத்தில் மனுக்கள் தாக்கல் செய்யப்பட்டது.