சொகுசு கார்கள் கடத்தல் வழக்கு: மலையாள நடிகர்களின் இடங்களில் அமலாக்கத் துறை சோதனை

சொகுசு கார்கள் கடத்தல் வழக்கு தொடர்பாக மலையாள நடிகர்கள் பிருத்விராஜ், துல்கர் சல்மான், அமித் சக்கலக்கல் உள்ளிட்டோரின் இடங்களில் அமலாக்கத் துறை புதன்கிழமை சோதனை மேற்கொண்டது.

- 

பூடான் எல்லை வழியாக சொகுசு கார்கள் இந்தியாவுக்கு கடத்தப்படுவதாக சுங்கத் துறைக்கு ரகசிய தகவல் கிடைத்தது. இதுகுறித்த முதல்கட்ட விசாரணையில் நடிகர் பிருத்விராஜ், துல்கர் சல்மான் போன்ற பிரபலங்களும் பணக்காரர்களும் அந்த கார்களை வாங்கியிருப்பது தெரியவந்தது.

இந்தக் கடத்தல் தொடர்பாக கேரளத்தில் கொச்சி, திருவனந்தபுரம், கோழிக்கோடு, மலப்புரம் உள்ளிட்ட மாவட்டங்களில் சுமார் 30 இடங்களில் அண்மையில் சோதனை மேற்கொள்ளப்பட்டது. அப்போது, பூடானில் இருந்து கடத்திவரப்பட்ட 36 கார்கள் பறிமுதல் செய்யப்பட்டன. இதில் பிருத்விராஜின் எந்த காரும் பறிமுதல் செய்யப்படவில்லை. அதேவேளையில், கடத்திவரப்பட்ட 2 கார்கள் துல்கர் சல்மானிடம் இருப்பது கண்டறியப்பட்டது என்று கொச்சியில் உள்ள சுங்க ஆணையரகத்தின் ஆணையர் டி.டிஜூ ஏற்கெனவே தெரிவித்தார்.

டி.டிஜூ மேலும் கூறுகையில், 'இந்தியாவில் பதிவு செய்ய இந்திய ராணுவம், அமெரிக்கா உள்ளிட்ட வெளிநாட்டு தூதரங்கள் ஆகியவற்றின் பெயர், முத்திரை, சின்னத்தைப் பயன்படுத்தி போலி ஆவணங்கள் தயாரிக்கப்பட்டது கண்டறியப்பட்டுள்ளது. கேரளத்தில் மட்டும் இதுபோல 150 முதல் 200 கார்கள் உள்ளன' என்று தெரிவித்தார்.